I whai tūru a Aotearoa ki Te Kaunihera Mauritau o Te Kotahitanga o Ngā Iwi o te Ao

Heeni Brown

He whakatau nui mō Aotearoa i te rā nei, i tō tātou whai tūru ki Te Kaunihera Mauritau o Te Kotahitanga o Ngā Iwi o te Ao.

I tō rātou rūnanganui i New York i te ata nei, neke atu i te rua hautoru o ngā pōti katoa i riro i a Aotearoa.  Engari he aha tōnā painga mā ngā uri Māori e noho nei i Aotearoa?

Ko te haepapa a Te Kaunihera Mauritau he whakahaere i ngā mahi rongopai, mauritau rā, ā, ko tētahi o ngā huarahi kei te whāia, ko te tuku i ngā hōia a ōnā mema ki ngā pakanga nui o te ao, ā, ko Te Ope Kātua o Aotearoa te wāhi mahi e mau nei i te nuinga o Ngāi Māori.

E ai ki tētahi mātanga take Māori ki a Aroha Mead, tērā te piki o te tūpono ka wehe ō tātou hoia ki whenua kē pakanga ai.

Tēnei ata, ko Aotearoa tēnā e tirohia ana e te katoa.

Tā te Pirimia kōrero ki te whakatau kua whai wāhi a Aotearoa ki te kaunihera mauritau tā te United Nations, he wikitōria tēnei mā ngā whenua pakupaku.

Engari kahore ētahi i te whakamihi i te whakatau nei.

Ko te rōia Māori ko Moana Jackson tētahi e mōhio ana ki ngā whakaritenga a te United Nations, ā, hei ko tāna nā runga i te mahi patipati kua whai tūru pēnei nā.

Ko tā Amerika mahi he whaiwhai tautoko ki te pakanga i a ISIS, te hunga e pakanga ana ki te whakatū i tō rātou whenua Islamic motuhake ki ngā rohe whenua mai i te raki o Syria ki te rohe waenganui o Iraq.

Ko tā mātou hōia taumata teitei rawa atu tērā i whai wāhi ki te rūnanga hōia rangatira me Barack Obama, ā, ko rātou tonu e whiriwhiri kōrero ana mō te take rā.

E whakapono ana a Jackson, ko te TransPacific Partnership Agreement tērā e whai pānga ana ki ēnā whiriwhiri kōrero hoki.

He tekau tau te roa o tā Aotearoa whai i tēnei tūru ki te Kaunihera Marutau, ā, ka noho a Aotearoa ki te tēpu whai mana mō te rua tau.

He aha tōnā painga mō ngai Māori?  Aianei tātou ka kite.