Kaupapa: Elections

I pēhea te tautohetohe i waenga i ngā kaitono o Te Tai Hauāuru?

Heeni Brown

Ko te tautohetohe tuarua a Whakaata Māori mō ngā rohe pōti Māori i tēnei tau kōwhiringa i takiri ake i runga i a Native Affairs inapō.

Ko te Rohe Pōti o Te Tai Hauauru tērā i tū atu ki te paepae kia wherawhera ai ngā kaitono Māori i ngā take o te wā e whai pānga nui ana ki tō rātou rohe pōti.

Tā te tatauranga pōti horekau he āwangawanga a ngā kaipōti o Te Tai Hauauru kia noho ko Te Pāti Māori ki te tēpū me Nāhinara.

Na, e horo ana te hoiho mua a Chris McKenzie ki te whakatika i te kaihautū,

A, ko tā te hoiho whai muri i a ia, tā Adrian Rūrawhe, he wetewete i te tatauranga pōti i whai wāhi atu ai te rima rau kaipōti nō te Tai Hauāuru, he wāea ā-whenua ō rātou, ki te whakautu i ngā uiui. Heoi, he whā ira toru waru ōrau te tūpono ka rerekē aua hua.

I te wā nei, he koni i te toru tekau mā tahi mano ngā tāngata kua rēhita ki te pōti mō Te Taihauāuru

Engari, tērā te matapae ka iti ake i tēnā te nama ka tuku pōti.

Nā whai anō te pātai he aha tā ēnei puru taitama hei whakapiki i ngā tatauranga pōti nei.

Ahakoa ko Jack McDonald o te Rōpū Kākariki te pōtiki o ngā kaitono, horekau i mataku ki te whakautu i te kaupapa nui a te rohe i meatia ai te tauwhāinga pōti, arā o te tūkino whānau.

Me tāna anō, kia tuku pōti ki tōnā pāti e whiwhi ai Te Taihauāuru i ngā mema pāremata tokorua mō rātou.

Heoi anō mā Jordan Winiata, he kotahi wiki te roa e whai tūranga ana engari e hāoa tonu ana e ia he pōti.

Na, he kaha nōnā ki te whakaputa i ngā take a MANA Movement.

Mutu atu te tautohetohe o Te Taihauāuru, ara mai ana ko te tautohetohe o Te Waiariki.

Hei te Rāhina ka tū ko Te Ururoa Flavell o Te Pāti Māori, ko Annette Sykes o MANA Movement, ko Rawiri Waititi o te Rōpū Reipa ki te pae tau-utuutu o Kōwhiringa Tekau Mā Whā.