Kaupapa: Kōhanga Reo

Hei tā Parata i tika te whakamōhiotanga atu ki ngā Minita o ngā whakapae e pā ana ki Te Kōhanga Reo

E whakaae ana te Minita Take Mātauranga a Hekia Parata, i tika te whakamōhiotanga atu o ngā Minita ki ngā whakapae raweke i ngā pūtea o te Poari Matua o Te Kōhanga Reo me tana kamupene tumataiti, me Te Pātaka Ōhanga.

Heoi, ahakoa tēnā, karekau a Hekia Parata i te hiahia uru atu ki te tohe e tū nei, i te hiahia o te Poari ki te pana i tā rātou hoa mema poari, i a Toni Waho mō tena mahi whakamōhio ana. 

Inanahi i hinga te tono a Toni Waho ki Te Kōti Teitei o Te Whanganui ā Tara kia aukatihia tā te poari hiahia pana i a ia.

Āe mārika he pērā rawa te taumaha o ngā whakapae hōu i karangatia ai te Tari Hara Taware.  He whakapae nā Toni Waho i whakamōhiohio ake - na tēnā kei te pīrangi te poari ki te pana i a ia.

Kei te whakaae a Hekia Parata e tika ana kia whakamōhiotia ngā Minita ki ngā whakapae raweke pūtea.

Heoi, karekau te Poari i whakamōhio atu ki ngā Minita, ahakoa i hui tahi ai rātou i te pō o mua i te karangatanga o te Tari Hara Taware.

Ko te whakapae a Toni Waho i te kōti he mahi whakakōtiti tēnā a te heamana takirua a Tina Olsen-Ratana i ngā whakaaro o te Minita.  Kei te whakahē a Tina Olsen-Ratana i tēnā.

Ko te whakatau a te Kōti Teitei ehara te pātai i whārikihia e Toni Waho i te mea hei tino wetewete mā te kōti, ā, ehara ngā whakatau a ngā mema poari i te mea hei whakawā mā te kōti.  Kāti, he maha ngā whakapae taumaha i whakapuakitia e Toni Waho, e ai ki te kaiwhakawā kāore ia i titiro hōhonu ki ēnā.

Kāti i whakapā atu mātou ki te Poari Matua engari kāore anō kia whakahoki kōrero mai.

Kāti, hei tērā marama tū ai te hui ā-motu mō te kōhanga reo ki Tūrangawaewae ki reira whakatēpungia ai te pūrongo a te kōmiti whāiti mō tētahi hanganga hōu mō te poari.