Kaupapa: Politics

Hei āpōpō kapi ai te wāhanga tuku ingoa mō te tūranga kaiārahi o Reipa

Kua heke a David Cunliffe i te whakataetae mō te tūranga kaiārahi o te Rōpū Reipa, ā, kua tuku i tāna tautoko ki te kaitono hōu, a Andrew Little.

I tū te kaiārahi ō-mua ki te aroaro o te hunga pāpāho i te rangi nei ki te whakapuaki ake i tāna hekenga i te whakataetae, i toko ake whai muri i te rarunga o Reipa i te Kōwhiringa Pōti i tērā marama. 

Ko Nanaia Mahuta te poutokomanawa mō David Cunliffe te kaiārahi ō-mua e heke iho ana i te papa whakataetae. 

Ko te kotahitanga te take, e mōhio ana a David Cunliffe e kore e taea e ia te whakapapapounamu i ngā wai karekare e toromi ana i te waka o Reipa.

E ai ki a Peeni Henare i mārama kitea te ngākau nui o David Cunliffe ki ngā take Māori, ēngari hei tāna kāore i te kaha kitea i te toenga o ngā kaitono.

Nō reira e ai ki te heamana o te kāhui Māori a Reipa - hei tēnei Rāmere hui tahi rātou me ngā kaitono, ā, ki reira whakamātauria ai.

Āe mārika, ko ngā tūranga māngai mō ngā take whānui te hiahia, āpiti atu kia whai tūranga teitei ake i te rārangi hōu.

Ka mutu e tautoko ana a Peeni Henare i te whakaaro kia rua ngā kaiārahi tuarua - kotahi he Māori.

Hei tāna he rautaki poipoi tōna tikanga kua whakaritea kētia e te hunga kaiārahi pērā me Helen Clark mā ēngari auare ake.

Kāti hei āpōpō kapi ai te wāhanga tuku ingoa mō te tūranga nei.  Kātahi ka kōkirihia ko ngā hui whiriwhiri ā-motu.