Kaupapa: Land

He wikitōria ki ngā kaipupuri whenua Māori te whakatau o te Ture Whenua Māori – Meka Whaitiri

Te Kāea

E ai ki a Meka Whaitiri o te Rōpu Reipa, ko te whakatau kia kaua e hohoro te kōkiri i te whakahōutanga o te ture whenua Māori ki rō pāremata, he wikitōria ki ngā kaipupuri whenua Māori. E ai ki te Perehitini o Te Pāti Māori, ki a Tukoroirangi Morgan, nā te whakatau a te Minita Take Māori, kei te whai wā ināianei ki te āta whakatikatika mo ngā whenua māori.

Kei te oranga ngākau te mema o Reipa a Meka Whaitiri, kaare te pire whakahōu i te ture whenua māori e kōkiri wawe ki rō pāremata.

E ai ki te perehitini o Te Pāti Māori, ki a Tukoroirangi Morgan he tika, he pono hoki te whakatau a te Minita kia kaua e wawe te kōkiri i tēnei take nui ki te māori.

Nō te tau rua mano tekau mā whā, e toru rau, e rua tekau mā waru mano tāra kua whakapaua ki ngā hui whakawhiti kōrero kotahi rau, e whitu tekau te nui, huri noa i te motu. Ko tā te Minita, ko te nui o ngā pūtea kua whakapaua, e hāngai tōtika ana ki ngā hua pūmau ka puta i te pire ki ngā kai-pupuri whenua Māori, whakatipuranga mai, whakatipuranga atu.

Hei tā Tukoroirangi Morgan, ināianei kei te wātea rātou ki te whakapai ake i te pire. Engari tuatahi ake, me uru anō te pāti māori ki rō pāremata hei te kōwhiringa pōti ki te whakature i te pire.