Kaupapa: Business

He whakawhānui i ngā hononga pakihi Pasifika te aro a FOMA

Talisa Kupenga , Te Kāea

He ono me te hāwhe miriona tāra hei pūtea āwhina kua tukuna e te Kāwanatanga o Aotearoa hei whakawhanake i te hunga wahine, hunga rangatahi anō hoki, hei hāpai hoki i te rāngai pakihi ki Hāmoa

He toro ki ngā whenua o te Moana-nui-a-Kiwa te aronga o FOMA, kia whakawhānui ai ngā hononga pakihi.

Ko tā te heamana a FOMA a Traci Houpapa kua tae te wā ki te aro ki ngā hononga pakihi kei ngā moutere.

I te rā nei e ono miriona tāra neke atu te pūtea tuku a Aotearoa hei whakatipu i te ōhanga o Hāmoa.

Ko tā te Pirimia a Jacinda Ardern, ko te tautoko i ngā pakihi iti hoki he painga mō te ohu tāpoi o Hāmoa.

Engari e hono ana hoki rātou ki a Haina, nā te whiwhi pūtea itarehi-iti mō te hangahanga, he tohu tēnei ki te nui o ngā hua kei te Moana-nui-a-Kiwa e puke mai ana.

Ko tā te Pirimia a Hāmoa a Tuilaepa Sailele Malielegaoi e aro ana a Hāmoa ki ngā āhuatanga kua oatihia kētia ki a rātou.

Ka mahi tahi hoki a Aotearoa ki te Manatū Pakihi, Ahu-mahi anō hoki ki te hāpai i ngā pakihi e hoko rawa ana ki tāwāhi.

E toru miriona tāra hoki te pūtea tuku ki a Hāmoa mō te whakapaipai i ngā whiunga a Gita.