Kaupapa: Elections

He urupounamu kua puta na te tautoko a John Key i tētahi hui kohi pūtea ma te Pāti Māori

I tae mai a John Key ki tenei kai ki te kohi putea ma te Paati Māori, engari na wai rā kua riro kē hei kai ma te ahi torangapu.

I whiua te pātai e tā mātou karere tōrangapū a Maiki Sherman ki te kaiārahi takirua o te Pāti Māori a Tariana Turia, he aha te take i whakahētia e rātou i a Hone Harawira me āna huihuinga me Kim Dotcom me te kii he moni anake tōna whāinga, mena ko te Pati Māori tēra e whai pūtea ana i tōna hononga ki te Rōpū Nahinara. 

Ko te whakahoki a Turia ki taua pātai “Ko tā mātou mahi he kohi pūtea i tono atu mātou ki a mātou hoa mo te tautoko. Kare au i te kite i te hononga o tērā kaupapa ki a Kim Dotcom."

Hei tā Hone Harawira, “Ko te Paati Nahinara ko te Pāti Māori he pāti kotahi.”

Kaati, ko te patai inaianei mena ka noho nama te Pāti Māori ki te Pirimia mō tana awhina whai muri i ngā kowhiringa pooti?

Hei tā Turia, “E noho ana matou ki te mahi tahi nā te mea ko rātou te Kawanatanga o te wā ka oti ai te hononga o a māua rōpū ki reira."

Ko tā te Pāti Māori ehara tēnei te wā tuatahi kua whai wāhi a Key ki tā rātou mahi kohi pūtea tautoko. I mua i te kōwhiringa motuhake mo te Ikaroa-Rāwhiti i whakahaerehia e rātou tētahi hakari, a he whā tekau mano tāra te pūtea i kohia e ratou i taua wā. 

Kaati, i te mutunga ka riro ki ngā kaipooti te kowhiri - ko wai ka noho ki te teepu, ko wai ka horoi i ngā riihi.