Kaupapa: Kōhanga Reo

He pātai ao ake i te pāhotanga o te pūrongo whakatewhatewha

E rere ana ngā pātai i te tī i te tā mō ngā mahi whakahaere a Te Poari Matua o Te Kōhanga Reo, ao ake i te pūrongo whakatewhatewha a te hōtaka, Native Affairs, mō te whakapaunga pūtea a ētahi o te taumata o runga o te poari matua, waihoki o tana kamupene, Te Pātaka Ōhanga.

Ka tatū atu ētahi mema o Te Poari Matua o Te Kōhanga Reo ki te Whare Pāremata nā te karanga o ngā minitia a Hekia Parata rāua ko Pita Sharples.

Kāti, ko te pūtake he tono whakautu i ngā kōrero kua puta mō te whakapaunga pūtea a ētahi mema poari, he pūtea tōna tikanga mō ngā mokopuna o te kaupapa.

E ai ki te poari matua o te Kōhanga Reo, kei te takiwā o te tekau mano tāra te pūtea e arotaketia ana e rātou, otira te whakapaunga tika o taua pūtea e ētahi o tana taumata whakahaere.

Nā ngā whakatewhanga o te hōtaka, Native Affairs, e taea e Te Kāea te whakapuaki i ētahi whakapaunga pūtea hōu a Te Poari Matua o Te Kōhanga Reo.

I roto i tētahi tāpaetanga a ture, e ai ki te kaiwhakahaere matua o Te Kōhanga Reo, e toru tekau mā waru ngā motuka o te Poari Matua, e whā anō tō Te Pātaka Ōhanga, tana kamupene tūmataiti.

E ai ki ngā whakamārama a Native Affairs, ko ētahi o aua motuka ko ngā mea a te kamupene Holden.  Kāti, katoa e whai kāri penehīni ana, ā, i tērā tau i eke ngā name motuka a Te Kōhanga Reo ki te rua rau, waru tekau mā waru mano tāra.

Ia tau, he waru tekau miriona tāra ka tukuna e te Manatū Mātauranga ki te Poari Matua o Te Kōhanga Reo, heoi, te āhua nei, kei te rangirua hoki te Minitia Mātauranga mō te āhua whakapaunga o ēnā pūtea.

Tūturu, e ai ki Te Kōhanga Reo, he mea kamupene tūmataiti a Te Pātaka Ōhanga.  Heoi, kei te whakahētia tēnā e tētahi kaiwhakawā o te Kōti Teitei, ko te take hei tāna, he pūtea tāke ka riro i a ia.

Kātoa o ēnā take kohukohu kua hika i te tironga hōmiromiro ki ngā whakahaere a ngā mema poari, he mema ka noho ki aua tūranga a mate noa, he taumata kāore e noho ana ki raro i te mana o tētahi atu, tae rawa hoki ki ngā minita kāwanatanga.

Kīhai te Poari Matua e hiahia ana ki te kōrero mai ki Whakaata Māori.