Kaupapa: Politics

He painga ngā raru o te Pāti Māori mo te āpitihana

Kua pokea ia e ngā taupatupatu mō ōna kaiārahi, ā, hoki atu ko taua āhua tonu rā i te ao tōrangapū, kua rere ake te hoariri ki te rapu painga i ōna pōraruraru.

Ko te hekenga ua ki te Pāti Māori anō nei he tōmairangi no runga mo te rōpu Reipa. E hiakai ana te āpitihana ki ngā tūru Māori i te kōwhiringa e haere ake nei, ā, ko ngā pōraruraru o te wā he kai ma tāna ahi.

Ko tā Shane Jones, “Tā mātou e hiahia kia riro katoa mai ngā tūru i a mātou engari me kōrero pono ahau he tino tangata a Te Ururoa, engari te mate kei a Tari rāua ko Pita a kua ū mārika rāua ki te paepae o te rōpu Nāhinara.”

Kā tika rā ko Shane Jones te kaitautoko hou i te kokonga o Te Ururoa Flavell, mō te tūranga kaiārahi kua rima marama inaianei e haehaengia ana.

Ā i te kōwhetewhete e pakaru mai ana ki te aroaro o te motu, e rere ana te pātai mēna koia te tīmatanga o te otinga?

Ko tā Parekura Horomia, “kei a rātou te wehewehe, engari e mohio atu tātou tēra te āhua i roto i ngā rōpu engari te wā nei kei ā rātou te whakaae kore whakaae.”

Ko tā Shane Jones, “he tangata māro a Te Ururoa tāku whakapae mahi nui kia turakina ai ā ia, engari ko te Pāti Māori ā kua timu te tai.”

Engari me matāra rā ki aua kōrero ā te mema aroākapa, ko Pita Sharples tāna hoariri ki te rohe pōti o Tāmaki Makaurau. Ā i te mōhio e 800 noa ngā tatau i waenga i a rāua i te kōwhiringa 2011, e rapu utu ana a Shane Jones.

Ko tāna,”tāria te wā kia tino tata rawa atu ki te wā pōti, kātahi ka koikoi rawa atu ngā maripi.”

E tika ana he papa pakanga te aō tōrangapu, ā, ko te hunga whai kaha kā puta ora mai.

Kairīpoata: Maiki Sherman.