Ngā kaupapa: Elections, Politics

He māharahara pea tō te hunga e pōio mōata ana - Māngai Tōrangapū

Talisa Kupenga

Kua tata pūrua te hunga kaipōti tōmua i tēnei o ngā kōwhiringa pōti. Kua piki ake te maha o ngā tāngata kua tuku kē ā rātou pōti mā te toru rau rima tekau mano.

E ono rau mano neke atu ngā tāngata kua pōti, ā, e haere tonu ana te kaute.

Ko tā Roihana Nuri, Māngai Tōrangapū, “Kei te tae wawe atu ngā kaitautoko o ngā rōpū nui e rua i te mea kei te māharahara aua hunga whakapono ka hinga pea tā rātou pāti."

Ēngari pēhea te rū a te kaipōti rangatahi, tērā ka huri pea i te hua o te kōwhiringa?

Ko tā te Tautōhito Pāpāho a Tini Molyneux, "Ka whakaaro pea te nuinga kua oho mai te hunga rangatahi i a Jacinda, ēngari tēra anō te whakatūpato ki tēra, na te mea kei kona anō te hunga rangatahi o Nahinara.

Ko Te Whare Hokohoko o Rotorua tētahi o ngā wāhi pōti matua e rima puta noa i te motu, ko ta Nuri he tohu pea mā tēnei tūru auraki e tūtohu i te aronga o te pāti toa.

"Ko te nuinga o te wā mēna kua Kahurangi ka Kahurangi te Kāwanatanga, mehemea ka whero te tāngata ka whero te kāwanatanga. I mua atu i a Todd McClay ko Steve Chadwick no Reipa, i Kāwanatanga rātou. Nō reira he tino tohu ki au te tūru o Rotorua Auraki ake nei ki te āhua o te hiahia o Aotearoa."

Kaore a Nuri e mōhio ko wai ka toa ki Waiariki, ēngari ko tā Molyneux whakapono ko Flavell.

Ko tā Nuri whakapae ka hingā tētahi pāti iti na te pakanga kahurangi-whero.

"Ko te Māori Party tēra ko Aotearoa tuatahi rānei ko Te Rōpū Kākariki rānei no te mea ko te katoa o ngā kaitautoko o rātou no ngā rōpū nui e rua."

Hei āpōpō ka aukati te rēhita kaipōti, ā, ahakoa te kakenga o rēhita kaipoti, he 340,409  neke atu kaore tonu kia eke ki te rārangi.