Ngā kaupapa: Elections, Politics

He hui me āna mema te mahi a te Pāti Māori, ko te hono tahi ki a Nāhinara te kaupapa

Nō te rangi nei waitohungia e Nāhinara āna kawenata mahi tahi ki a United Future me te rōpū ACT.

Hei te paunga o tēnei wiki e matapaetia ana ka tatū hoki te whakaaetanga a te Pāti Māori, ao ake i nga hui e whakahaeretia ana e te Pāti Māori me āna mema i ēnei rangi tonu nei.

Kei te pīrangi a Nāhinara kia oti wawe ēnei tū kōiriiri, kia kokiritia ko ngā mahi nunui kei te aroaro o te Kāwanatanga.

Nā, ko tētahi o ērā ko Te Ture Rawa Taiao, arā te ture Resource Management Act, he ture kāore i eke nā ngā whakahē a te Pāti Māori me United Future.

Ka mutu, koia tētahi o ngā take i kōrerohia ki te hui pāpāho a Peter Dunne rāua ko John Key i te rangi nei.  

He ringa raupā tō ēnei tokorua, koinei te wā tuatoru kua noho ngātahi rāua ki te tēpu kāwanatanga.

Heoi, e tika ana ka uaua ake pea tēnā mahi inā te rahi o ngā tūru i riro i a Nāhinara.  Hei tauira ko Te Ture Rawa Taiao i aukatihia e ngā pōti a United Future me te Pāti Māori.  He ture kei te tihi o te rārangi mahi a John Key.

E ai ki a United Future me te Pāti Māori ko tērā e whakahēngia ana e rāua ko ngā wāhanga tuaono, tuawhitu, e kite ai i te ngoikoretanga o ngā mātāpono tiaki i te taiao.

Hei tā Peter Dunne i te rangi nei kei te pīrangi ia kia whakamāmāngia, engari e kore a John Key mō te whakakahore i tā Nāhinara whakamahi pea i tana ake rahi kia tutuki ai.  

Kei Te Waipounamu a Te Ururoa Flavell i tēnei wā e hui tahi ana ki ngā mema o te Pāti Māori me te kohikohi whakaaro pēnā me noho ano ia ki te tēpu kahore rānei.  E ai ki a Te Ururoa Flavell kotahi tonu te whakaaro e puta ana.

Ka mutu ko David Seymour o te ropu Act, he tauhou e toru tekau mā tahi tau te pakeke, kua whai mana i raro iho i te taumata minita mō ngā rāngai mātauranga, ture ārahi kāwanatanga hoki.

Nō reira, ko Seymour tērā kua whai mana ki te rāngai mātauranga, e ai ki a John Key ka riro ki a ia te mana nui mō te kaupapa kura hourua a ACT, ā, e kore e kahore ka noho ia hei minita a tōna wā.

Mō Peter Dunne, ko āna rāngai tawhito i mua i te kōwhiringa pōti ano ērā, arā, te Minita Take Taiwhenua, me te Minita Tuarua mō ngā Rāngai Hauora, Atawhai hoki.

Hei tā Flavell i te rangi nei, ko tētahi tūranga Minita tērā e hiahiatia ana, ā, kei te rāngai Minita Take Māori, Minita Whānau Ora pea te titiro i tēnei wā.

Heoi, e mōhio ana hoki he aro tō te Pāti Māori ki ngā take whare me ngā take hauora, nō reira, he tūranga minita tuarua pea ki aua rāngai hoki pea kei te aroaro.