Kaupapa: Elections/Kōwhiri

E whakaaro ana a Willie Jackson ki te tu hei māngai ma te rōpu Ipurangi Mana

He kai-whakapāoho Māori rongonui anō, he kai-tōrangapū ō-mua hoki kei te whai whakaaro ki roto i te whakataetae mō te rohe pōti Māori o Tāmaki Makaurau. Ko te rōpu Ipurangi Mana te waka.

E ai ki tā mātou kaikawe kōrero i ngā take tōrangapu ki tā Maiki Sherman i kōrero i a ki a Willie Jackson a i whiua te pātai, mena e whakaaro ana a Jackson ki te tu hei māngai ma Ipurangi Mana ki Tāmaki. Ko tana whakahoki ki ta matou karere, Ae e whakaaro ana ia ki te tuku i tōna ingoa hei māngai mō taua rōpu.

Kua kati ai te wāhanga tuku ingoa mō te tūranga kaitono a te Rōpū Reipa ki te rohe pōti o Tāmaki Makaurau.

Tokorima ngā ingoa kua tae mai ki Te Kaea - ko Peeni Henare, Shannan Halbert, Reina Harris, Ani Hawke rātou ko Will Flavell.

E ai ki ngā kōrero kua ranongahia e Maiki Sherman, i tū tetahi hui i waenga i te komiti a rohe o Reipa mo Tāmaki Makaurau, ā, tokowha rātou i tae a tinana atu ki te tuku kauhau mō ta rātou hiahia kia tu hei kaitono ma Reipa ki Tāmaki Makaurau.

Ko Peeni Henare te tama a Erima Henare, te heamana o Te Taura Whiri i Te Reo Māori, te mokopuna hoki o te mema paremata o mua o Tau Henare Pakeke, i tipu ake ki te Tonga o Tāmaki.

Ko Shannan Halbert tētahi mema o te komiti a rohe o Tāmaki Makaurau a Reipa, he kaimahi ki te kareti o Hato Petera, no te iwi o Kahungunu.

Na he uri a Reina Harris no Hokianga, ā, katoa rātou tokotoru a Reina, Shannan me Peeni, i te whare wananga o Tāmaki Makaurau i ngā tau ki muri ka mutu i whai wāhi ki ngā mahi arahi i te rōpū ngā tauira Māori.

Will Flavell, e mohiota ana koia te upoko o te tari Māori i te kareti o rutherford, waihoki, koia anake te tangata i tū i tona ringa i te taha o Shane Taurima i te rauna tuatahi o enei kowhiringa.

Na, karekau a Ani Hawke i tae atu ki te hui inapo, heoi, e ai ki nga whakamarama he wahine kei ona tau ono tekau kua roa e mahi ana ki ngā ratonga hauora Māori.

Tuaritia: