Kaupapa: Elections

E whai ana a Harawira te haumaru i te hunga noho tōroa ki Aōtearoa

Me haumaru a tātou whanaunga o Te Moananui a Kiwa. Koina tā te roopu Mana, e hiahia nei kia whakawāteatia taua hunga noho tūwhena ki Aotearoa nei.

Ko te aro he hiki i te wēhi ka mauheretia wawetia rātou, ka mutu ka whai wāhi ki te tono nohoanga pumau.

I a Hone Harawira e arotake ana i te urunga mai o ngā kamupene hinu no tawāhi, e pōhiri ana a Mana i te hunga noho tōroa no ngā moutere kia whai mana noho pūmau ai.  

Hei tāna. “ehara au i te kī me noho mai te katoa, heoi me hiki ake te āwangawanga kia tāea e rātou te tuku i ngā tono tika, te tukuna i a rātou tamariki ki te kura, kia hāere ki te mahi rānei.”

E ai ki a Mana he take tēnei ka kawea e ia ki te tēpu whakawhitiwhiti, waihoki, ko Reipa pea tera te whai atu. Heoi, he korero ano ta David Cunliffe.  

“Kua oa te māka a Mana, he māmā noaiho ma ngā rōpu iti nei te tuku oati, heoi kei ngā rōpu nui te mana nui.”

He whiu māro i a David Cunliffe mo te mana matāmua, he mana e ai ki a Hone Harawira e tui ana i ngā ngutu o ngā mema paremata moutere o roto tonu i a Reipa.

Ko tā Harawira, “ kua tohua e te kaiārahi kei hea te raina, inā kei te noho tonu a Su’ā ki tāna e tohu ai.”

E ai ki ngā whika a te tari o te Minita Take Manene a Michael Woodhouse, i tērā tau kō tata atu i te tekau ma toru mano te tokomaha o te hunga noho tōroa ki Aotearoa, ā, he haurua rātou no ngā moutere o te Moananui a Kiwa. Hei tāna, ki te koke te hiahia o Mana, ka piki haere taua whika. 

“Mēnā e mohio ana rātou he kaupapa haumaru kei reira ka noho tonu rātou ki tēnei whenua e tatari ana mo taua ahuatanga, nā konā ka tere piki ake aua tatauranga.”

Kāti, mā te wā noa e tohu pēnā ka whai waewae tēnei kaupapa a Mana, pēnā rānei ko ngā waewae kē o te hunga noho tōroa te hikoi nei.