Kaupapa: Kapa Haka

E tirohia ana te kaiārahi takirua o te Pāti Māori ki ngā ahuatanga e kaha pēhi ana a Ngāi Māori kei Ahitereiria

Heeni Brown

Kei Poihākena te kai-arahi takirua o Te Pāti Māori, a Te Ururoa Flavell i tēnei wā. Ā, no te ra nei i hui tahi ia ki ētahi rangatira, whānau, roopu Māori hoki kei reira e noho ana ki te matapaki i tētahi ture i mana i te tau rua mano mā tahi, e uaua ai tā rātou whai tautoko i te kāwanatanga mo te mātauranga, nga take toko i te ora, me te mahi.

Tokorima noa nga tāngata i waha atu i ngā take nui nei ki mua i te kaiarahi takirua o Te Pāti Māori, ki a Te Ururoa Flavell. Hei tā Te Ururoa ki ta mātou karere kei Ahitereiria ki ta Heeni Brown i te rā nei, kua haramai ia ki te Whenua Moemoeā ki te āta whakarongo, he aha hoki ngā tino take e pēhi nei i ētahi o ngā uri Māori e noho ana ki Ahitereiria.

Nā, e ai ki Te Kāhui 'Iwi in Aus', ko te pūtake o ngā raru katoa, he mea ahu mai i te korenga o ngā uri e āhei te whai puka uruwhenua o Ahitereiria.

He manomano Māori ka tae ki Poihakena mo te whakataetae kapahaka ā-motu o Ahitereiria āpōpō.

Ko te maha o rātou, i hūnuku mai i Aotearoa ki Ahitereiria noho ai, i muri mai i te tau rua mano mā tahi.

Ko ēnei ngā kai-ārahi o 'Iwi in Aus', he kāhui e pakanga ana kia mana ai te noho a Ngāi Maori ki Ahitereiria nei.

Mō te wā nei, ko te whakarongo ki ngā take, otirā ki ngā nawe, te mahi nui mā Te Ururoa Flavell.

He uaua te matakite atu, ka ahu pēhea ā muri ake nei. Na, pena raini ka ea tuturu nei ngā nawe i a Te Ururoa engari, e ai ki a Iwi in Aus, he tīmatanga pai tēnei.