Ngā kaupapa: Tūhoronuku, Waitangi

E taute ana a Ngāpuhi i te wero a te Pirimia

He wero nui ki te iwi o Ngāpuhi i whakatakotoria e te Pirimia i roto i tana kauhau i te rā nei. Hei tā John Key, kua eke te wā kia koke whakamua te whakataunga kokoraho a Ngāpuhi, ā, hei whakahohoro i te iwi, kua whakapuakitia e te kāwanatanga, he ara whakatenatena i a rātou.

E ai ki tā mātou karere take torangapu, a Maiki Sherman, “ko te ara tenei e riro ai ki a Ngāpuhi ētahi whenua karauna, pūtea ranei, i tua atu i tēna o tana kokoraho.”

I ngā mana nui e parakuihi ana i te hui a te Pirimia, he kai ano i whakatakotoria e John Key ki te tēpu ma Ngāpuhi kia hiakai ai rātou ki te whakatau wawe i tana kokoraho Tiriti o Waitangi.

Ko tā Key, mēna ka mahi tahi a Ngāpuhi ki te whakatau i a rātou kerēme ka tuku pūtea ano pea te kāwanatanga ki a rātou hei taunaki i a rātou mahi.”

Ko te whakahoki a te heamana o Te Rūnanga ā iwi o Ngāpuhi, ko Sonny Tau, “he tumomo mirimiri raho ano e kore mātou e me tirohia hohonutia te kaupapa katoa na ko kona matou whakaae kahore ranei ki tana tono.”

Ko tā Pita Tipene o Ngāti Hine, “kia kaua te kāwanatanga e pei i a Ngāpuhi, mena ka pera ko te kōti te mutunga.”

Heoi ko tā te Minita o ngā take tiriti ko Chris Finlayson, “ehara mātou i te pei  i a Ngāpuhi, kua whakatakotohia e mātou he wero noaiho, mena kare ratou i te hiahia tēra e pai ana, mena ko te kōti te mutunga e hia rau mano tāra ka utua ki ngā kōti.”

Tuturu kei te poho o tenei take ko te mana whakatau i te kokoraho, he mana kua ono tau e tohetia ana i waenga i a Tuhoronuku me Te Kotahitanga o Ngā Hapū o Ngāpuhi. Otira, inā te kakama o te kāwanatanga, ko te whakapono ko Tuhoronuku tāna e tautokotia nei.  

E ai ki a Sonny Tau, kei te takiwā o te haurua piriona tāra te wāriu o te whai a Ngāpuhi, ina te rahi o te iwi me tōna rohe. 

Hei tāna, “koia tēra ko te timatatanga, aini pea ka tae ki te kotahi piriona horekau ke au e mohio ana i tenei wa e hoa ma ngā te whakatatunga o tena.”

Kīhai te Minita Take Tiriti i whāki mai mēna ka tukuna e rātou te hāwhe piriona tāra, heoi ko tāna mēna kua rite ai rātou ki te kōrero mo taua take me kōrero ka tika.

Noreira, he koputu whenua karauna, he pūtea ranei ngā rare a te kāwanatanga mo Ngāpuhi. Ki te whakaaetia e te iti me te rahi, ka tukuna ki a ratou i mua i te whakataunga whakamutunga.