E kōkiri ana a Te Ururoa Flavell i ngā Hui Whakahononga ā-rohe

E kōkiri ana te Minita Take Māori, a Te Ururoa Flavell i ētahi hui, e kīa nei ko ngā Hui Whakahononga-ā-Rohe, e whai wāhi ai te marea ki te whakatakoto i a rātou take ki tōna aroaro.

Ka tū te hui tuatahi ki Te Poho o Rāwiri Marae hei tēnei Rātapu ki Tūranganui-a-Kiwa.

I tōpū te tautoko mā Te Ururoa Flavell i te rohe pōti o te Waiariki.

Ināianei kei te pīrangi te Minita Whakawhanake Māori hōu kia whakahokia atu taua tautoko ki te iwi whānui.

Hei tā Flavell, “I te wā o te kōwhiringa pōti i puta te kōrero, māmā noa mō koutou tōrangapū mā ki te haere i te mata o te whenua kōrero mai mō ngā hiahia e wawatatia nei e koutou.  Engari kāre koutou i te whakapā mai ki te iwi tonu nō reira koinei te tikanga o te haere ki roto i te iwi.”

E ai ki te Minita e kore e kahore ko ngā take i kōrerohia i te wā o te kōwhiringa pōti ērā ka whai wāhi nui, pēnei me ngā take ā-mahi, ā-whānau, ā-hauora hoki.  Heoi, he wero hoki tāna ki te hunga haramai.

E ai ki a Flavell, “Ēhara i te mea kei te haere au kia ruaki mai te āo Māori i ōna nawe ki mua i te aroaro o te Minita ēngari kia haere mai anō hoki me ētahi whakaaro me ētahi huarahi hei whāinga.”

Kua tohua e Flavell ko te hiki ake i te rahi o ngā tamariki Māori mai i te pōharatanga tētahi take ka aronuitia e ia, me te tohu ki a Whānau Ora me te ohanga Māori hei rongoā.  

Ki tā Flavell, “Mēnā ka taea e au a Minita nei te āwhina i tērā momo āhuatanga ka pai hoki ēngari he tuatahitanga tēnei, he whakatūwhera i te kuaha ki te Minita ka mutu tōku ngākau ki te ao Māori.”

Kāti mā te wā ka kite pēnā ka whai tautoko anō ai te Minita i tēnei rautaki tatau tūwhera āna, pēnā rānei he nui noa atu ngā raru ka uru mai.