Kaupapa: NZ Māori Council

E ai ki te Rōpū Whakamana i te Tiriti o Waitangi kua taka te karauna ki te hē

E ai ki te Rōpū Whakamana i te Tiriti o Waitangi, i takahi te Karauna i ngā mātāpono o Te Tiriti i tāna arotake i te Ture Whakawhanake Hapori Māori, te ture tūāpapa a te Kaunihera Māori o Aotearoa me Ngā Wātene Māori anō hoki.

Ko tētahi wāhanga nui o te ture Whakawhanake Hāpori Māori ko te mana motuhake a Ngāi Māori ki te whakahaere i ōnā ake kaupapa, nō reira, e ai ki te Kaunihera Māori o Aotearoa, mā Ngāi Māori kē tētahi arotake o taua ture rā e kōkiri, kaua mā te Karauna.

Ā, e taunakitia ana tēnā e Te Rōpu Whakamana

Ko te mana motuhake o Ngāi Māori ki te whakahaere i āna ake take e kitea ana i roto i te Ture Whakawhanake Hapori Māori anake. E ai ki a Tā Taihakurei Durie, koi ngaro pea tera i te arotake i te ture, mei kore ake ko te kitenga a Te Rōpū Whakamana.

E ai ki Te Rōpū Whakamana i takahi te Karauna i ngā mātāpono o Te Tiriti i tana kore manaaki i taua mana i tana arotake i te Ture Whakawhakanake Hapori Māori. Ko te tohe a Te Kaunihera Māori ki te Taraipiunara i te marama o Poutu-te-rangi, ma Ngāi Māori kē te arotake e ārahi, kaua mā te Karauna, otira mā Te Puni Kōkiri.

Nā taua mana motuhake i te ture, i whai ara ai te Kaunihera Maori ki te kawe take ki rō kōti pēnei i te tohe mō nga kokoraho Tiriti o Waitangi, Nga Reo Irirangi a Iwi me Whakaata Māori, nga Ngahere Karauna, me te mana ki te wai.

Karekau he mana ā-ture nei to ngā rōpū pēnei i te Te Kāhui Rangatira ā-Iwi, Nga Wahine Māori Toko i Te Reo, a wai ake rānei i tēnā mana. Nōreira, ko te ara whakamua, e ai ki a Tā Taihakurei Durie, he tohu i tētahi rōpū ki te kawe i tēnā mana mō Ngāi Māori.

Ko te tohutohu a Te Rōpū Whakamana kia arahina tēnā mahi e Te Kaunihera Māori whai muri i ana kōwhiringa pōti hei te waenganui tau e tū mai nei.

Kāti ko te whakaaro i tēnei wā kia kōrero ngātahi ngā rōpū Māori matua, mā reira ka whakaritehia ētahi kōwhiringa, kātahi ka kawea ake ēra ki etahi hui puta i te motu hei whakataunga mā te iwi.