Tokomaha ngā tāngata i tae atu ki te tangihanga o Tama Huata

updated Te Kāea
  • Te Tai Rāwhiti
Te tangihanga o Tama Huata

Mangu katoa a Waipatu Marae i Te Matau a Māui mō te whakaekenga o Tama Tūranga Huata, he ono tekau mā whā ngā tau ka mate i ngā ringaringa o tōnā whānau inanahi.

E ai ki a Ngahiwi Tomoana, kaikōrero mō te whānau, ā, rangatira hoki o Ngāti Kahungunu kua rite tōnā iwi ki te manaaki i te hunga tāngata ka tae mai ki te poroporoāki i tēnei pouwhakahirahira o te ao ā-Rēhia i ngā rangi kei te haramai. 

Ko te kukume tēnei o te ukaipo, o Waipatu Marae i tōnā uri-taeoreore o te ao haka.

Ko Tama Tūranga Huata tonu kaiwhakaara i te whakataetae kapa haka matua o te motu, a Te Matatini.

Nānā i tō mai i ngā mata tini nei ki te poroporoāki i a ia.

Hei tā Tomoana, "Ināianei e whakapau kaha te whānau kia toro ngā ringa ki ngā ope kua haramai mai i ngā kokonga whānui o te motu tonu.” 

Ko Kahungunu tonu te tuatahi ki te kōrero mō tō rātou pāpā.

Tērā te matapae, ka tae mai te tini o te motu me te ao hoki ki te tuku i tō rātou aroha mutunga mōnā.

E ai ki a Tomoana, "Tētahi o Waihirere i tae mai i tēnei ope kei te haramai he ope o Te Arawa, ngā rōpū o Te Arawa hei te ahiahi hei āpōpō ka haramai hoki te whānau mai i Kānata.

Hei āpōpō, ka terehia te ara ki Mihiroa Marae i Pakipaki, ki reira tiraha ai te tūpapaku, tae mai te Rātapu ka tanumia ki Whenuakura urupā, ki te tākotoranga o ngā mātua tūpuna.