Kaupapa: Kapa Haka

Ngā Whakataetae Kapa Haka ā rohe o Mataatua

Heeni Brown, Te Kāea
  • Waikato/Te Waiariki

E whakapaetia ana ka koni i te waru mano tāngata ka tae ki ngā whakataetae ā rohe o Mataatua, a, ko ratou tonu kua roa e pumau ana i Te Reo Māori ki te rārangi mataamua o o rātou whakataetae.

A, ko Te Matatini teera kei te whai i te tauira a Mataatua, me te whakauru i te reo Māori ki te wāhanga mataamua o te whakataetae mo te wā tuatahi a tēra tau.

Ko Mataatua whānui e tawharautia ana i to rātou whakataetae ā rohe.

Ko tā te heamana o Mataatua rohe, ko Te Kahautu Maxwell, “tēnei ra a Mataatua kua huihui ki ngā kuri a whārei no reira ka whakaeke ki runga o Ohututaihi ki te mihimihi ki a Mataatua tonu, a, hei apopo kua tū a Mataatua ki te kohuru ano i a Mataatua.”

Kua roa te whakataetae ā rohe o Mataatua e haere ana heoi no te tau iwa tekau mā whitu kua noho te wāhanga reo Māori hei māka matua i roto i ngā mahi a ngā kaiwhakawā.

Ko tā Te Kaahautu, “na Mataatua i para i te huarahi i whakatauiratia ki ngā rohe, e taea ai a no muri mai i a matou ko ngā kura tuatahi, ko ngā kura tuarua.”

Kotahi anahe te waiata ka whakawāngia e Mataatua hei tuāpapa mo ngā māka o te reo.

Engari hei tēra tau ka whakauruhia e Te Matatini, te reo Māori hei māka matua o te whakataetae mo tōna wā tuatahi.

E meatia ana a Herewini Parata, Heamana o Te Matatini, me whakawāngia e nga kaiwhakawā katoa i te reo Māori. Ko ngā wāhanga waiata kua tohua ki aua kaiwhakawā, ki reira rātou e whakawāngia motuhake i te reo. Ko te reo kōrero anahe, kaua ko te reo tuhituhi ka whakawāngia e ratou.

Heoi ano, mo te whakataetae o Mataatua e rima anahe nga rōpu ka whai wāhi ki Te Matatini a tēra tau.

Hei apopo ka eke ngā kapa ki tēnei o ngā papa whakatūwaewae ki konei whakataetae mo ngā tūranga e uru ai ratou ki ngā taumāhekeheke o Te Matatini a tēra tau.

Mo ngā whakamahuki o te kaupapa whai hāere i a mātou pōhi i runga i a puka mata.

https://www.facebook.com/media/set/ set=a.412481658888721.1073741869.133906693412887&type=3&uploaded=10

#TeKāea #MāoriTV #HakaNation #HakaHome