Kaupapa: New Year's Honours

Kua whakamānawahia ngā mahi a Ngāi Māori i te rārangi hōnore o te tau hou

Te Kāea

Arā ētahi Māori kua whakamihia i te rārangi hōnore a te Kuini mō ā rātau mahi whakapau kaha i roto i ō rātau ake hapori, i roto i ngā mahi toi, mātauranga, hauora, ngā mahi o te hapori, te pākihi hoki.

Robin John Cooper - Companion of the New Zealand Order of Merit

Ko John Cooper to Tumu Whakarae o te tarahiti hauora o Ngāti Hine, ā, kua tohua ia hei tā i te New Zealand Order of Merit mō āna mahi i te ao hauora Māori, mātauranga, i ngā mahi whanake papori.

Mai rā anō i ngā tau o te waru tekau a Cooper e whakahaere kaupapa ana, mō te Māori te painga atu. Ko ia te tumu whakarae o te tarahiti hauora o Ngāti Hine, ā, ko ia tētahi o ngā ringa hāpai ki te whakarewa i tētahi whare mātaranga mō ngā kōhungahunga ki Kawakawa. Ki reira tuaritia ai te mātauranga ki ngā tamariki kotahi rau. I huaki ngā tatau o te kōhanga o Mirumiru i te Huitanguru i te tau 2002. He whare i whakatūhia ki te tarahiti hauora o Ngāti Hine.

Dr Monty Glyn Soutar - Officer of the New Zealand Order of Merit 

Kua tohua a Tākuta Monty Glyn Soutar hei āpiha i te New Zealand Order of Merit mō āna mahi hāpai ake i te Māori me ngā mahi rangahau taketake.

E tika ana te kōrero ko Soutar te tino tangata Māori e mau nei i ngā mātauranga e pā ana ki ngā pakanga o te ao, i ngā pakanga Māori hoki. I mahi tahi ia me Whakaata Māori inā tata nei ki te waihanga i tētahi pakipūmeka e titiro ana i te hiranga o te Hokowhitu a Tū i te pakanga tuarua o te ao.

I tēnei wā ko ia kaihitōria Pakanga tuatahi o te ao ki Te Papatongarewa o Tāmaki Makaurau, ā, he mahi hoki āna ki te Manatu Taonga. Ki reira tuhi kōrero ai ia mō te Māori i tae atu ki te Pākanga Tuatahi o te ao. 

I te tau 2012, I whai urunga ia ki te First World War Centenary Panel. Nōna te ringa hāpai kia tū Te Pouhere Kōrero (Māori Historians Association) i te tau 1993. Ko ia hoki te kaiwhakahaere o te whārangi ipurangi 28th Māori Battalion.

Mr Kukupa Tirikatene - Officer of the New Zealand Order of Merit

Ka whakawhiwhia ki a Kukupa Tirikatene tana āpihatanga mō te New Zealand Order of Merit mō tana mahi i te ao mātauranga. 

Mō ngā tau whā tekau, kua tū a Tirikatene hei kaiako reo Māori, kaiako hitōria Māori, tikanga hoki. Ko ia te kura māhita Māori tuatahi i te Kāreti o Rosehill i Papakura mai i te tau 1976, ā, he nui tana tautoko ki ngā tauira Māori, otirā, ki ngā whānau Māori. 

Inā te nui o ngā whakatauki, ngā waiata hoki kua titoa e ia, ā, kua tū ia hei kaumātua mō Ngaī Tahu Whānui i Te Papa. Ko ia te kaumātua mataamua o Ngāi Tahu ki Waipounamu, he mema tuāpapa ia mō Ngāi Tahu Whānui ki Tāmaki Makaurau, he kaitohutohu ahurea ia ki ngā kāwana o Te Rūnanga o Ngāi Tahu, ā, he māngai hoki ia mō tōna iwi tonu i ngā hui taumata.

I whakawhiwhia ki a ia te tohu Tā Kingi Ihaka i te pō tuku taonga Creative New Zealand i te tau 2009.

Colleen Elizabeth Urlich JP - Officer of the New Zealand Order of Merit

Kua tohua hoki ko Colleen Elizabeth Urolich JP hei āpiha mō te New Zealand Order of Merit mō āna mahi ki te ao toi Māori.

Ko ia tētahi o ngā mema tuāpapa o te rōpū Ngā Kaihanga Uku, he rōpū i whakarewahia mō ngā ringa toi uku i timata i ngā tau o te waru tekau.

Kua tū ia hei kaiārahi mō ngā ringa toi rangatahi, ā, kua whakaahuatia ā rātau mahi toi ki te ao. Nāna te kaupapa o Māori Arts Collective of Te Taitokerau i whakarewa, me te aha, he mema ia o te komiti Te Atinga Visual Arts ki Toi Māori Aotearoa. Nā Urlich te whakakitenga e kiia nei ko Toi Ngāpuhi i timata, ā, ko tērā te whakakitenga toi nui rawa o Ngāpuhi, o Aotearoa.

Roma Ruruku Hippolite - Member of the New Zealand Order of Merit 

Kua whai urunga a Roma Ruruku Hippolite ki te New Zealand Order of Merit mō āna mahi i te ao hauora Māori.

Ko Hippolite te kaikōkiri i ngā mahi pakihi, ā, kua ārahi ia i te tarahiti o Ngāti Koata kia tutuki pai ā rātau whakataunga tiriti. Nāna hoki te mahere hara Māori a te tae whakarunga o Te Waipounamu i tūrara, ā, ko ia te ringa hāpai i ngā kamupene ā iwi kia tū pakari ai rātau.

Kua āwhina ia i ngā ratonga hauora Māori kia āta titiro rātau ki ā rātau whakahaerenga, me te aha, kua tuaritia e ia ōna mōhiotanga ki ētahi ratonga hauora kē. Inā ngā poari kua tū ai ia hei heamana, hei mema hoki. Ko tētahi o ērā ko te poari o te Kāreti o Mana, te Tarahiti Pāpāho o Whakatu, te Poari Hauora a rohe o Whakatu, te Kamupene Hauora o Tāhimana/Whakatu, te Poari Hauora ā Iwi, te Tarahiti o Ngāti Koata, Tainui me Taranaki ki te Tonga.

Aroha Dawn Geraldine Campbell - Queens Service Medal

Ka whakawhiwhia ki a Aroha Dawn Geraldine Campbell te mētara o te Kuini mō tāna whakaū ki a Ngāi Māori. 

He kaitarahiti ia mō Tauhara North No 2, ā, koa ia te Tahuhu Rangapu mai i te tau 2005. He nui hoki āna mahi hei hāpai ake i te whakarewanga o te Teihana Hiko o Ngā Awa Purua, he mea tūhono ki a Mighty River Power. I te tau 2013, ko te $136 miriona te tōpūtanga o te pūtea i riro i te tarahiti.

Kua waihangatia mai e te Tarahiti ētahi hōtaka mātauranga. Ko tētahi ko ngā akoranga Kip McGrath mā ngā tamariki. Kua whakahaeretia e ia ētahi hōpuni mā ngā reanga maha. Ko te ngako o tēnei kaupapa, kia ako i ngā pūkenga oranga ki ngā tamariki.

Te Ariki Derrick Mei - Queens Service Medal 

Ko Te Ariki Derrick Mei tētahi anō kua whakawhiwhia ki te Mētara a te Kuini mō tāna urupū ki a Ngāi Māori i te takiwā o Wairoa. 

Kua mahi a Mei mā te Kaunihera ā rohe o Wairoa mō ngā tau rua tekau neke atu hei kaiako reo Māori, tikanga Māori hoki. Kua whakamahia e ia ōna wheako mātauranga hei āwhina i ngā kamupene o te rohe. He mema hoki ia mō te Poari o Wairoa-Waikaremoana mai i te tau 2000. 

Inā ngā mahi āna hei āwhina i ngā hōtaka a Te Whare Wānanga o Awanuiārangi hei painga mō ngā marae o Wairoa.

I riro i a Mei te hōnoretanga ki ngā tohu reo Māori o Ngāti Kahungunu, he kaupapa tēnei e whakamānawa ana i ngā tāngata matatau ki te reo.

Hoana Pearson - Queen's Service Medal 

Ko Hoana Pearson te kaiwhiwhi i te Mētara a te Kuini mō tāna urupū ki a Ngāi Māori, ki te mātauranga hoki.

Ko Pearson te tumuaki o te Kura o Newton Central ki Tāmaki Makaurau. Nō te tau 1994 tīmata mai ai āna mahi i reira. I tērā wā ko ia te kaiako reo Māori mātaamua o te akomanga Māori. Kua roa nei e kitea ana ōna tutukitanga i roto i ngā mahi kaiārahi, ā, kua kitea hoki tōna kaha kia puta whakaihuwaka ngā tamariki Māori i te kura.

Kua ārahi ia i tētahi kaupapa kāwanatanga ki roto i te kura, he mea tautoko nā Ngāti Whātua ki Orakei, arā, kia waihangahia mai tētahi karāhe āmiorangi ki te marae. He karāhe e kōrero Māori ai ngā tamariki.

Kua mahi tahi ia ki ētahi kaiako kia tutuki i a rātau ō rātau whāinga i te kura, ā, kua kitea āna tutukitanga e OECD Special Advisor on Education Policy.

Dr Susan Jane (Huhana) Hickey – Member of the New Zealand Order of Merit 

Kua whakahōnoretia a Dr Huhana Hickey mō tāna mahi tahi ki ngā tangata hauā, ā, ko ia anō te kaiwhakahaere o te kamupene e kiia nei ko Pukenga Consultancy. He kamupene rangahau e hāngai katoa ana ki ngā momo hauātanga.

I tēnei wā, ko ia tētahi o ngā pouako, kairangahau hoki i te Whare Wānanga o Tāmaki Makaurau, i te wāhanga rangahau o Taupua Waiora Māori Health. 

Ko Tākuta Hickey tētahi o ngā kaiwhakahaere i te kaupapa accessible Marae mō te rōpū Wairoa i te tau 2009, 2010 hoki. Ko ia te māngai taketake mō te International Disability Association. I ārahi ia i te tira nei i te wā i tū ai ngā whanaketanga mō te United Nations Conventions on the Rights of Persons with Disabilities. He mema pūmau ia mō te rōpū kua tapaina ki te ingoa Indigenous Disabled Women's Researchers Network International i te tau 2003.