Kua tatū atu tētahi rōpū minita ki roto o Taranaki ki te hui tahi me ngā iwi o reira

  • Te Tai Hauāuru

Kua tatū atu tētahi rōpū minita, waihoki te Pirimia a John Key, ki roto o Taranaki ki te hui tahi me ngā iwi e waru o reira.

He kaupapa tēnei o te whakaaetanga mahi tahi a te Pāti Māori me Nāhinara, ara, kia hono atu te kāwanatanga ki ngā whānau, hapū, iwi, tae rawa hoki ki ngā uepu Māori.

Mō te roanga o tēnei rā i hui tahi te Minita Whakawhanake Māori a Te Ururoa Flavell me ētahi uepu Māori o te rohe, ko te Poari Māori o Taranaki tētahi, tae ake hoki ki tētahi ratonga whānau ora.

Heoi akoko ake nei karapinepine mai ngā māngai o ngā iwi e waru o Taranaki ki tēnei whare kai, ki konei hui tahi ai me te Pirimia me John Key, rātou ko te Minita Whakataunga Kokoraho Tiriti a Chris Finlayson, me ngā kaiārahi-takirua o te Pāti Māori a Te Ururoa Flavell raua ko Marama Fox.

Nōreira, i kōrero ai ahau ki ētahi o aua māngai ā-iwi i te rangi nei mō ngā kaupapa nui ka horahia e rātou ki te aroaro o te Pirimia.

E huna ana a Maunga Taranaki i te rā nei, engari ko ana iwi e waru e kore e huna i o rātou whakaaro ki te Pirimia mō tō rātou tūpuna maunga.

Ko ngā mahi ahuwhenua e whai wāhi nui ana ki tēnei rohe, ā, ko Paraninihi ki Waitotara e angitū ana.

Heoi, kua neke atu i te whitu tekau tau ngā mahi kahi me te hinu e whakahaeretia ana, ā, tee whai hua ana ngā iwi.

Tūturu ko te whakapakari i te tū o Taranaki whānui ki ngā mahi ōhanga o te rohe tētahi aronga nui.

E whakaae ana ngā iwi ko ngā whakataunga kerēme ka whai wāhi nui ki ngā mahi ōhanga.

O ngā iwi e waru o Taranaki, e whā kua whakatau i o rātou kerēme.  Ko Ngāti Maru Wharanui e whai tonu ana i te mana whiriwhiri.

Tūturu, e ai ki a Te Ururoa Flavell e tika ana he maha ngā take hei kōrerotanga me te Pirimia, nā whai anō te wawata ka maha ngā hua ka puta.

Kāti, e kīa ana ko te kai a te rangatira he kōrero, nōreira te tumanako a ngā iwi he tino hakari kei te haere.