Ka tau mai ko te tumu whakarae hōu

Te Kāea

Kua pōhiritia ōkawatia te tumu whakarae hōu o Whakaata Māori, a Paora Maxwell i runga i te marae o Te Puea i Mangere i te ata nei.

Kua rahi atu i te rua rau ngā tāngata i tae ā-tinana atu ki te hāpai i te whakatūnga mai o Maxwell hei ārahi i a Whakaata Māori. I roto i te hunga i tae atu ko ētahi kaimahi o Whakaata Māori me te whānau a Maxwell anō hoki.

I te putanga mai o tana whiwhinga ki te tūranga nei i te Maehe kua hipa, i mea mai a Maxwell ki ngā kaimahi, "He hōnore nui tēnei mōku. Nōku te whiwhi", ā, kāore hoki ia mō te whakapanoni i roto tonu i te pae tata.

Hei ko taana, "He tino pai ngā whakaatūranga a Whakaata Māori. E tino hīkaka ana ā roto ki te mahi ngātahi me ngā kaimahi o Whakaata Māori ka tahi, ka rua kia hāpai tonu ai tēnei whare pāpāhō hei tino teihana i roto i te ao"

I taia ko tautohetohe i te tūkanga tumu whakarae hōu o Whakaata Māori i runga anō i ētahi whakapae i hainatia tētahi petihana e ētahi kaimahi kia aukati i tana whiwhi i te tūranga mahi rā. Kāti, i whakaōhititia te Poari e te tumu whakarae ō mua, e Jim Mather, mēnā ka whai atu rā a Maxwell i te tūranga, tēnā pea ka wehe atu ētahi kaimahi mātāpuputu.

Tērā tonu ētahi whakapae i hua ake, kua tohua a Maxwell kia whakamatua i te wahanga pūrongo, take o te wā.

Ka mutu, i whakaparautia rawatia ngā whakapae nei e te heamana o te poari matua o Whakaata Māori, e Georgina Te Heuheu me Maxwell anō hoki.

Ka whakakiia e Maxwell i te tūranga kua mau nei e te tumu whakarae mō te wā katahi anō nei ka hipa, arā, e Alan Withrington, nāna i whai atu ai i tēnā tūranga i te wehenga o Jim Mather kia tū ai ia hei rangatira mō Te Wānanga o Aotearoa.

Ā te pō nei, kawe tonu ai a Te Kāea ngā nekenekehanga me ngā nukunukuhanga o tēnei kaupapa.