Kaupapa: Tūhoe

I whakapāha atu ngā Pirihimana ki a Ngai Tūhoe

Mere McLean
  • Waikato/Te Waiariki

I tau atu te Toihau hou o te Ope Pirihimana, a Mike Bush ki te aroaro o Tūhoe, ki te whāriki i te whakapāha mō ngā urutomohanga o te tau rua mano mā whitu. 

Neke atu i te toru rau ngā tāngata i whakakotahi ake ki te whakarongo ki te whakapāha, heoi, arā tonu ētahi i tae ake ki te marae o Te Rewarewa i Rūātoki i te rangi nei, e hiahia tonu ana kia tuku whakapāha a Howard Broad, koia te toihau pirihimana i te wā o ngā urutomo.  

Kua whitu tau, engari kua toko ake tēnei mahi ki te pae hītori.

E ai ki a Te Ururoa Flavell o te Pāti Māori, “Ko tēnei te rā mo Ngāi Tūhoe, otira kia noho te kōmihana ki mua i a Ngāi Tūhoe whānui tonu tuku i tana kōrero.”

I hiki te kohu ki Te Rewarewa marae i te rangi nei, ā, hiki ana hoki ko te taumaha nui kua kawea e Ngāi Tūhoe mai anō i ngā urutomo i pā i te tau rua mano mā whitu.

E apataki ana i te toihau pirihimana a Mike Bush ko ngā rangatira nō ngā iwi nō te Moana-a-Toi puta atu ki Te Tairāwhiti. I a ia e whakaeke ana, ko te haka o Ngāi Tūhoe e aurere ana i a iti me nui.

Hei tā Tamati Kruger, “I whakarongo a Tūhoe i rongo i ngā kōrero o te kōmihana, ā, i tango ērā kōrero ka pine ki te uma o te iwi.”

Na Tūhoe te whakatau kia noho rāhui ngā kōrero whakawhiti o te whakapāha tērā i tū ki roto i te whare-kai I Te Rewarewa marae.  Koinei te wā tuarua kua tae mai te toihau pirihimana ki Ruātoki, i ngā wiki e rua ki muri i tae mai ia ki te whakahohou i te rongo ki waenganui i ngā whānau e rima i urutomotia i te tau rua mano mā whitu. 

E rua ngā whānau i roto i ngā whānau e whitu i urutomotia kihae i aro ki te kupu whakapāaha, engari ko tā te Toihau e tūwhera ana tana kūaha.

E ai ki a Tamati Kruger, “Kāre e puawai tātau i roto i te pouritanga me te mamae me riri.”

E rere ana ngā kōrero whakawhiti mo te kapeheihana.  Engari mo tēnei rā he tūherenga hou tēnei ki waenga i ngā pirihimana me Tūhoe.