Kaupapa: Kapa Haka

Kua whakatuwherahia te Whakataetae Kapa Haka o Ahitereiria

updated Te Kāea
  • Ahitereiria

E iwa ngā Kapa Haka kua whakarauika atu ki Poihakena, Ahitereiria ki te whai i tētahi o ngā tūranga e toru kei te wātea ki runga i te ātamira o Te Matatini 2015 i Otautahi.

Katahi ano kia pohiritia ngā kapa, ngā kaitautoko, ngā kaiwhakawā, rātou ko ngā manuhiri tuārangi. Hei whakahonore i te mana o te iwi moemoea kua whakahāerehia e ngā tāngata whenua o Ahitereiria he kaupapa motuhake ki reira hei whakanui i te kaupapa.

Ko te tawhiti o te hāere mo te nuinga o ēnei rōpu he tauira o tā rātou manawanui ki ngā mahi a Rehia. Ko ētahi o ngā kapa kei te Hauāuru o Ahitereiria, ko ētahi kei New South Wales, ētahi atu kei te hau mai i Queensland kia whai pānaga ki te Whakataetae Kapa Haka ā Rohe o Ahitereiria.

Ko ngā kapa kua whakaurua ki te whakataetae i tēnei tau ko Te Puna Marama, Te Toi O Ngā Rangi, Te Papakanui-a-maui, Tuwhitia, Te Huinga Waka, Te Raranga Whanui, Te Kura Roa, Turanga Ake, rātou ko Manawa Mai Tawhiti.

Ka timata te whakataetae hei te Rahoroi, e ai ki ngā kaiwhakahāere, tapiri ki te haka, kei reira ano ētahi toa hoko kai Māori, ētahi toa hoko tāonga Māori mo te marea ka hau atu.