Kaupapa: Business

Te karanga a FOMA kia awhi te Kāwanatanga i ngā ohu Māori ki te whakamahi tika i o rātou whenua

Me awhi te Kāwanatanga i ngā rōpū Māori ki te whakamahi tika i o rātou whenua.  Koinā te karanga a te rōpū FOMA e whakahaere nei i tā rātou hui ā-tau hei ēnei rangi okioki ki Whanganui. 

Otirā ko ētahi o ngā rōpū Māori tino whai rawa kei reira e tautoko ana i te karanga.

Kua tohua te kāwanatanga hōu, ā, kua takoto te mānuka ki tōna aroaro e ēnei pakihi Māori.

He mema poari a Stan Pardoe mō te kamupene Whāngārā Farms.  E ono tau ki muri i whakakotahi ētahi tarahiti e rua i raro i te maru kotahi, ā, kei ngā miriona tāra te wāriu o te ohu ināianei.

Kua piki haere te wāriu o ngā hokonga hua miraka ki tāwāhi ki te toru ira rima piriona tāra i te tau kua hipa, engari ko tā ētahi, me kaha ake tā te kāwanatanga tautoko i ngā pakihi Māori.

He tauhou a Donna Tuwhangai ki tēnei hui.  He mema poari ia i te tarahiti pāmu o Te Uranga B2 ki Taumarunui, ā, ko tāna, hohonu ana te puna mātauranga i te hui nei.

Hei te pō nei hora ai he hakari motuhake ki konei, ā, hei āpōpō rere ai tētahi kauhau whai take mō te arotakenga o te Ture Whenua Māori e haere ana i te wā nei.