Ngā kaupapa: Environment, Indigenous

Māori supporter shares her Standing Rock protest experience

I tae ā-tinana atu a Johanna Lloyd rātou ko tōna whānau ki te hōpuni o Oceti Sakawin kei te pae o te pakanga ki te Raki o Dakota, ki reira haka ai.  Kātahi rātou ka hoki mai i te huinga iwi taketake a te 7th Generation Fund i Kareponia, ā, i peka atu rātou ki te pākainga o te iwi Sioux i Standing Rock. 

He pātere nō te kainga, he mihimihi, he haki rangatiratanga Māori, me te haka tautoko ngētehi o ngā tākoha a Johanna rātou ko tōna whānau ki mua i te hunga kaitiaki wai.

“He nui tā rātou aroha ki a papatūānuku, ki te taiao, ki te wai, he ōrite ki a mātou te hunga Māori.  Ko te wai tō mātou oranga me whakaora i te wai hoki.”

Nō tērā pō Wenerei, i tae atu ai a Johanna rātou ko tōna whānau ki te hopuni o Oceti Sakowin.

“I te āhua mataku rātou, nā tō rātou kore mōhio, ko wai mātou, tērā pea nō te taha pirihimana pea.  I te wā i kī, nō konei, nō Aotearoa, i tino harikoa rātou, i kī, aww he Māori koutou.//I tau tā rātou wairua.”

I pātai atu a Te Kāea mo te wairua i reira.

“Aww, tino mataku, nā te kore mōhio tērā pea ka mauheretia e mātou, te nui o tō rātou patu i a rātou ki reira, yeah, tino mataku i reira, heoi, i te wā i tae ki reira, i tae i raro i te rangimārie me te aroha, ka tāea te rongo tino nui te aroha.”

Nō tērā wiki, he haka tautoko te mahi mā runga ipurangi hei whakakaha i ngā iwi taketake o Standing Rock, e whai ana tēnei i te karanga a pae papori a Myron Dewey, kairīpoata iwi taketake o Amerika.

“Tino koi ka tāea te tapahi tētehi mea.  Tino mataku rātou hoki, nā te kore mōhio ka aha, kāore rātou e mōhio mēnā ka tae mai ngā pirihimana.”

Ko te pupū ake i te riri a te ringa ā ture me ngā iwi kaitiaki wai i te manga o Cantapeta, tētehi mānukanuka o Johanna.

“Kia noho i raro i te haumaru o te pai, nā te tino kaha o ngā pirihimana ki te patu i a rātou, me te kore āwangawanga ki a rātou.”

He kaha tonu te taunaki ā ipurangi ki te iwi Sioux nō Standing Rock, kua whakaritea kia tū tētehi haka tautoko ā tini, mā ngā iwi katoa, ki tēnei Pā Tūwatawata o Rangiri, hei te ahiahi pō o te Rāmere nei.