Kaupapa: Entertainment

Mā ngā iwi katoa te kanikani Airihi tae noa ki a Ngāi Māori

Wepiha Te Kanawa

Nō te rangi nei timata ai te whakataetae a motu mō ngā kanikani taketake Airihi, ā, tata ki te rua rau ngā kaikanikani ka tū.

Engari e manako ana tētahi kanikani nō Ngāti Porou ki te pupuri tonu ki tāna taitara a motu i tēnei tau.

Kei pōhēhē he whakataetae wahine rerehua tēnei, engari kē ko te whakataetae ā-motu mō ngā kanikani Airihi.

E whitu tau te uri o Ngāti Porou a Brooke Elliott-Forster e kanikani ana, ko ia te toa o te motu mō ngā kōhine i raro i te tekau tau te pakeke. I tēnei ata i eke ia ki te papa whakataetae.

I koa te uri o Ngāti Maniapoto a Tiana West ki tana tū.

Ahakoa he whakataetae Airihi kē a TIDA NZ, e ai ki te kaiwhakahaere nō ngā iwi katoa ngā kaiwhakataetae.

I te rā nei ka eke ngā nohinohi ki te papa whakataetae, apōpō ko ngā pakeke.