Kaupapa: Australia

Kua tūhono anō ki ngā kōiwi a ō rātau tīpuna

Te Kuru o te Marama Dewes

Tokowhitu ngā tūpuna kua whakahokia ki a Ngāti Manu, nā ngā mahi wetewete a Te Whare Taonga o Whanganui i hauhake i ngā tātai whakapapa ki Ōpua.

“He rā nui anō tēnei mō tātau o Ngāti Manu te hokinga mai o ngā kōiwi o ngā mātua tūpuna, rātau i tāhaengia i tērā rau tau i Ōpua.”

Hei tā Ngāti Manu, nō te rautau kua hipa kāwhakina atu ngā kōiwi nei e te Pākehā, taro taka te wā ka tau ki Te Whare Taonga o Whanganui.

“Wēnei kōiwi taonga he taonga ki ō mātau tūpuna ki a mātau he tino taonga.”

Nō te tau kua hipa toro atu ai ngā āpiha o te Whare Taonga o Whanganui ki a Ngāti Manu, kia whakarite i ngā āhuatanga e whakahokia ai ngā taonga nei i ngā ringa atawhai o te tika.

“Tō mātau kōrero anō ki a rātau, me whakahokia mai rā ki te wā kāenga nei ki roto o Taumārere, ā, ka nehungia rā e mātau, koina hoki te kaupapa o te rā,” te kī a Hamilton. 

He wheako hou tēnei mā Ngāti Manu.

“Ahakoa ko te pouri anō rā e harikoa e hoki ana rā ō mātau tūpuna ki te wā kāenga.”

Ināianei ka nehua, ara rā, ka tutuki tō rātau takoto ki rō wāhi tapu.