Kua puta anō rā ngā karanga mō te aukatinga o ngā whakapōauautanga

Heeni Brown

He huihuinga o ngā mema pāremata, o ngā mema o te hāpori anō hoki i tū ai kia wānanga tahi mō ngā pēhitanga o ngā whakapōauau whai mana ki tō rātou hāpori

Hei tā Shane White, 'kāore anō kia tino puta mai ētahi whakautu ki ngā pātai me pēhea te whakatau, te whakapae, whakatika ā tātou nei rangatahi e kaha kai ana i tēnei o ngā ngāngara'

Nā, ahakoa he koni atu i te tekau mā rima ngā toa hokohoko whakapōauau i tō rātou takiwā, me te mea anō hoki, kahore tētahi o ngā mema pāremata e tautoko ana kia aukatitia katoatia ai tēnei mahi.

Ko tā Iain Lees-Galloway e kii nei “Tēnā pea e tāea ana e tātou te aukati ā-ture i ēnei momo āhuaranga, i runga anō i te pōhēhē horekau he take e patu nei i a tātou. Ka mutu, he pai ake pea kia huri atu te aro ki te hōhonutanga o tēnei puna me te rongo i te tino taniwha kiriweti e takoto ngohi ana i tōna rua. He pai tonu pea kia rangahaua he aha rā te take e huri atu ai a Māori, a wai atu rānei ki tēnei whakapōauautanga”

Engari e ai ki tētahi atu, me kāua rā tātou e whakaae kia uru mai ngā āhuatanga whakapōauau pēnei ki roto i ō tātou hāpori.

Hei tā Shane White, “me aukati tūturu, i te mea kua hoki tētahi o ngā whakautu o te hunga kai, ā, kua whakaae mai te ture kua whakaae mai te Kāwana karekau he kino”

Ahakoa te huarahi kei mua i te aroaro, whakapono tonu ana ēnei tāngata e kore rawa ēnei whakapōauau whai mana i te pai mō ngā whānau.