Kua pōti te Kaunihera o Tāmaki Makaurau kia tūwhera tonu Te Waonui o Tiriwā

Nā Te Kaunihera o Tāmaki Makaurau te whakatau i te rā nei kia noho tūwhera tonu Te Waonui a Tiriwā ahakoa te rāhui a te iwi manawhenua, a Te Kawerau a Maki hei tieki i ngā Kauri e mate haere ana i te Mate Kauri.

He mōtini nā Te Kōmiti Taiao me ngā Hapori kia whakamanahia te rāhui a Te Kawerau a Maki, kua hinga nei tekau mā tahi ki te whitu te pōti a ngā Kaikaunihera.

Ko tā te Kaunihera ā Rohe o Waitākere, ko te mate nui o te rāhui he uaua ka ū tonu te marea, ā, mehemea kotahi anake te tangata e hīkoi haere ana ki rō ngahere, he mōrearea tonu tērā kei wherahia te pokenga nei ki wāhi kē.

Hei tā te Kaunihera o Tāmaki Makaurau ka aukati rātau i ētahi o ngā ara hīkoi mōrearea, arā, ngā wāhi e ngau nei te pokenga mate kauri.

Āpiti atu, ka whakapai hoki rātau i ngā ara kia whakaheke i te nui o ngā paru e kawea ana e te hunga e hīkoi ana ki ngā koko o te ngahere.

Kei te pari o te rua ngā Kauri o te Wao o Tiriwā.

Hei tā te rangatira o Te Kawerau a Maki a Te Warena Taua, “E kī ana a mātau tūpuna tekau mā whitu ētahi atu rākau ka mate he nui tērā, he nui tērā.

I tae atu te manawhenua ki te hui a te Kaunihera o Tāmaki Makaurau ki te whakatau i te rāhui ki mua i ngā kaikaunihera.

“Me huri mai te karauna ki a mātau i te mea ko mātau ngā mea e mātau ana ki ēnei āhuatanga kātahi anō rātau ka tae mai ki konei,” te kī a Te Warena Taua.

He rīpoata nā Te Kaunihera a Tāmaki Makaurau e mea ana, i ngā tau e rima kua hipa kua pūrua te nui o ngā Kauri e hinga ana i te mate patu kauri, i te ngahere o Waitākere.

“Nā reira ko tāku, kia kaha rātau ki te whai i te tika. Ki te kore, ka kore te ngahere,” te kōrero a Te Warena Taua.