Kua nehua te kaiwhakapūmau i te reo, a Rawiri Rangitauira

Ki Te Waiariki, nō te rangi nei, nehua ai tētahi rangatira o Ngāti Whakaue, o Te Arawa waka, arā, a Rawiri Rangitauira. Koia te roia i kawe i te kokoraho mō te reo Māori ki Te Rōpū Whakamana i Te Tiriti o Waitangi, he whawhai i arahina e rāua ko tōna hoa rangatira, ko Cathy Dewes.

Waipuke ana a Tunohopu Marae i te hunga maringi roimata mo tētahi toki pīkau i te whakarauoratanga o te arero tūpuna, i te wā e kīa ana kua tamate haere te reo Māori.

Hei tā Whaimutu Dewes e pā ana ki a Rawiri Rangitauira, “Ko ia tā mātou roia ko ia tā mātou whakaruruhau, mātou ngā mea tere te pukuriri ana ka kī mai a ia he wā tō te pukuriri, he wā tō te kōrero.”

E ai ki a Joe Williams, “Ko Rawiri te mea i para i te huarahi mo tōku reanga te uru ki roto i ngā mahi ture, ina ra hoki ko ia, ko raua ko Whaimutu Dewes nga roia tutahi i roto i nga tau whitu tekau pea.”

Ko Rawiri Rangitauira raua ko tana hoa rangatira a Cathy Dewes ētahi o te hunga ārahi i Te Rōpu Reo Māori o Pōneke na rātou te whawhai kia whakamanatia te reo. I whakatakoto petihana, toru tekau mano waitohu te kaha, ki te whare paremata. Ka mutu na Rawiri Rangitauira tonu i tū hei roia kawe i te kokoraho mō te reo ki te Taraipiunara.     

Hei tā Joe Williams, “He kaupapa nui tēra, nui te mahi engari nui ngā hua i puta. Ko te pouaka whakaata Māori, ngā reo irirangi Māori, ngā kura, ngā wānanga katoa o wēra i takea mai i tēra whawhai ōna, ā, me tana tima. norerira kare i tua atu i te kōrero he tipua tēnei tangata mo te ture, me te reo.”

Heoi, i ngā tau tata nei raru ai a Rawiri Rangitauira i tētahi mahi tinihanga a-ipurangi nei, na wai rā ka mauheretia.

E ai ki a Whaimutu Dewes, “Tohu tēnei o tana rangatiratanga ahakoa i putu ki raro nā te kaha o te aroha o tōna iwi me tōna whanau ki a ia ka tu ano a ia ki te mahi mō te iwi.”

I tōna hokitanga atu ki toōna iwi ka huri a ia ki te tuhi puka whakamārama mō ngā mōteatea a tōna iwi a Ngati Whakaue. He taonga ka riro mā ana tamariki hei whakaoti ake, ka mutu nā tētahi o ana tamariki tokoono i tito mōteatea mo toōna pāpā ao ake i tōna hinganga.

E mea ana a Whaimutu Dewes,“O ngā mea i ōhākīngia e a ia, koina te mea kia mau tonu, to rāua whānau, kua whakatipu mai ki roto i te reo aroha, i whakatipu mai hoki to rātou kaha ki te whai i ngā tikanga a koro a kui mā.”

Ahakoa kua ngū inaianei a Rawiri Rangitauira, ko tōna reo kaha i a ia i te nuku o te whenua te take e kawea whanuitia ana te reo i ēnei rā nei, ā, haere ake nei.