Kua hui tahi ngā uri o Mokomoko hei whakamaumahara i a ia

Mere McLean

Rere ana ngā kare a roto i enei uri o Mokomoko, i a rātou e whakamaumahara ana i te kotahi rau, rima tekau tau o te whare karakia o Hiona ki Opotiki me ona kōrero.

Hei tā Te Riaki Amoamo, “Papa ana te whatitiri, haruru ana te rangi i roto i tēnei toru rā, ki a mātou i konei.”

Kei enei pakitara o te whare karakia e iri ana ngā kōrero tuku iho.  I konei i kohuruhia te minita a Te Waakana.  Ka tahuri te Karauna me o rātou whakapae ki Te Whakatohea, ko te matenga o Mokomoko te otinga atu.

Ko enei whakamaumahara e whakatakoto ana i tētahi ara whakamua mō te minenga o Opotiki me te haahi.

I tera tau i wetekia ngā whakapae ki runga o Mokomoko nā te whakamanatanga o te pire unu hara mōna ki roto o te whare paremata.  I tēnei rā, ka whakaarahia ngā kōrero hitori hei tirohanga whakamua.