Ko te reo Māori mā te katoa

E tono ana tētahi kohinga umanga nō Tāmaki Makaurau whānui kia hāngai hoki te aro o te rautaki reo Māori hou, ki a Ngāi Aotearoa whānui. E whai ana te āki nei i te putanga o te rautaki hou e kīa nei, ko Te Reo Māuri Ora, e kawea ana ki te motu hei tirohanga mā te katoa.

Ko te pūtake o te umanga Commets, he mahi ngātahi me te Kaunihera Mananui o Tāmaki Makaurau kia tika tōna whakaraupapa kaupapa here tikanga, here tāngata i ōna hāpori maha, ā, hei tā rātou, me kaha ake te whai whakaarotanga o Ngāi Niu Tireni ki te mana o te reo Māori.

Hei tā te tumu whakarae o Commets, tā Susan Warren, “kei te tokoiti haere te maha o ngā kaikōrero e matatau ana ki Te Reo Māori, nōreira me whai wāhi tātou te hāpai ake, te hiki ake i taua nama”

Me tōna āwangawanga ka pēhea tonu tērā e whakatutukihia, i te mahuetanga mai o ngā kaupapa here e whakapoapoa ana i a ngai tauiwi o Aotearoa, i te mahere reo Maori hou a te Minita take Māori.

Ko te ākī nui a Susan i a te hunga e whakahaere ana i te rautaki reo Māori hou, kia tūpato rā inā mahue mai ai ētahi kaupapa here i a ngāi tauiwi, inā ko te whainga matua, he whakaora i te reo rangatira o Aotearoa hei painga mā ngā tāngata katoa, Māori mai, Pākehā mai.