Kaupapa: Te Reo Māori

Ko te hōtaka taiohi hōu o Pāia kua tohu ki ngā whiringa toa o Ngā Tohu Reo Māori

Ko Maui Television Productions tētehi kei ngā wāhanga e rua o ngā whiringa whakamutunga mō Ngā Tohu Reo Māori i tēnei tau. Ko tana hotaka hōu, e kīa nei ko Pāia, tētahi kei roto i te wāhanga taiohi.

Ko Pāia, he whakaaturanga hukere i ngā wero ā-kori tīnana mā ngā kaiwhakataki mātātahi hōu i a Waioira McLeod o Ngāi Tūhoe me Ngāti Awa rāua ko Rereahu Collier

“Tē taea te whakakupu i ngā kare ā-roto mō tēnei o ngā hōnore o Pāia,” i kī atu a Collier. “Me taku mīharo hoki kua eke ki ngā taumata e taea ana te tutuki ēnei o ngā hōnore hoki.”

He whakataetae te aronga mā te takirua ki ngā tūmomo korikori e rima tekau mā rua ki ngā wāhi papai o Aotearoa.

“Nā ngā kaiwhakataki kōrua ā rāua ake kōrero i tuhi,” i mea atu i te Ringatohu, i a Meihana Te Huia.

“Nā rāua ngā whakaaro i whakauru atu, nā rāua i whakarite ā rāua mahi whakapakari tīnana. Nā reira kātahi te tokorua autaiā ko rāua me te koi.”

Ka kōrero atu a Collier, “Ko tētahi o ngā ākoranga matua mōku, e toru ngā ture, tuatahi kia māmā, tuarua kia mārama, tuatoru kia tika. I tino pai te haere o ngā tuhinga, ahakoa te maha hoki, ahakoa te nui o ngā mahi mā māua.”

Nō te tau rua manō tekau mā whā i whakaihu waka ai a Rereahu me tōna matua, ko te rangatira o te whare pāpāho o Maui i tā rāua tohu Reo Māori mō tā rāua wero RnR ki Puka Mata, i te tau whai atu ko te hōtaka o Ngā Taumata Rau i toa ai i te wāhanga Pāpāhotanga.

“He mea nui tēnā te titiro whakamua ki ngā reanga kei te whai ake,” ka kī atu a Reuben Collier. “Pēhea te whakaako i ā rātou, te whāngai i ā rātou, te hunga e hiakai ana ki ngā momo mahi nei.”

Ka rangona e ngā kaiapataki ngā mahi mā te kāmura, kawenga kāmura, me ngā kāmura rere.

“Mā tēnei hōtaka ka ako ai te hunga rangatahi ngā tamariki i te kāinga ētahi momo kīwaha hōu, ētahi whakapakari tīnana hōu,” i mea atu a Te Huia.

Ko te manako ia ka whai terenga tuarua ki tāwāhi ki Ahitereiria me ngā moutere o Te Moananui a Kiwa.