Kaupapa: Tā moko/Kirituhi

Kīhai tētahi wahine mau moko kauae i whakaaetia kia whai wāhi ki tētahi whare kaukau i Hapani

Wepiha Te Kanawa

Kei te noho whakamā, ohorere hoki tētahi wahine Māori whai muri i tana korenga e whakaaetia kia uru ki tētahi whare kaukau i Hapani, nā tana mau moko kauae te take.

Kua kitea whānuitia a Erana Te Haeata Brewerton i ngā karere nui o te ao, nā te mea i whakakāhoretia tāna urunga ki tētahi whare kaukau 'Onsen' i te takiwā o 'Eniwa-shi, ki te motu o Hokkaido'.

Kei Hapani ia mō tētahi hui reo iwi taketake, kei te taha o te iwi Ainu, te iwi taketake taua whenua.  He iwi mau kirituhi, pēnei i te moko a te Māori.

He ture whakatepe tā ngā whare kaukau o Hapani mō te hunga mau kirituhi, ā, kua puta te āwangawanga ki te Whare Pāremata.

Kei te heke mai ngā kēmu nui o te ao ki Tokyo a te tau rua mano rua tekau, ā, kei te ngana te kāwanatanga kia whai maramatanga hōu te hunga mō iwi kē atu.