Kei te tuitui te kiriata Te Iwa o Matariki i te iwi Māori ki ngā tikanga taiao

Te Kuru o te Marama Dewes

Ko Te Iwa o Matariki tētahi kiriata poto e aro atu ana ki ngā whetū kua warewaretia, arā a Pōhutukawa me Hiwaiterangi. Ko tā te kiriata e mou mai, ko ngā hiahia a ngā mātanga tikanga Māori a Paraone Gloyne kia kaha te aro mai ki ngā tikanga Māori.

E ai ki a Paraone Gloyne, Mātanga Tikanga ki Te Whare Wānanga o Aotearoa, "He wā pai a Matariki ki te whakatō anō i roto i a tātau te whakapono Māori, kia whakapono anō tātau ki o tātau ake kōrero me te māramataka Māori."

Hei tā Paraone kua tawhiti te iwi Māori i tōna taiao me ngā tikanga i ahu mai i a ia.

"Kua kotia kē ērā aho i waenganui i a tātau ko te taiao, ko tā tātau i te tau nei he whakatānekaha anō kia renarena ai te taukāea o tātau ki tō tātau taiao."

Hei tā Paraone Gloyne, mā te whakamānawa i ngā tikanga o Matariki ērā wawata e tutuki.

"Kia horopū, kia niwha ngā whakaaro ki a Matariki, kia noho mai a Matariki hei kaituitui, kia tuitui i a tātau te Māori ki te taiao."

Ko tā Paraone anō, ahakoa ngā mahi kua tutuki i ngā tau, me pakanga tonu mō Te Reo me ngā tikanga.

"Mā tātau anō tātau e whakahōia. Koina taku kī. Kia kaua tātau te Māori e noho hāneanea noa iho kei pōhēhē tātau kua ora katoa i tātau te reo ngā tikanga kao, he nui tonu ngā mahi hei mahi mā tātau."

Hei āpōpō te rā whakamutunga o te kiriata o Te Iwa o Matariki ki Tāmaki Pāenga Hira.