Kei te noho tōtara wāhi rua tētahi poari ā-kura

Dean Nathan

Kua rite ngā mema kaiako o te uniana o Te Wehengarua kia kaua e whakaako i ngā tamariki o ngā kura hourua. He tino āhuatanga hoki tēnei i mua atu i te tūwheratanga o te kura hourua ki Whāngarei Terenga Paraoa hei te paunga o tēnei wiki.

Kei runga te aronui i te poari o Te Kura Tamatane o Whangarei e whiri ana i tētahi whakaaetanga kia ako ngā tauira nō te kura hourua o Whāngarei Terenga Paraoa.  Engari inā whakaae rātou ka tēnā pea ka hikoi ngā kaiako.

E mea ana te heamana, a Tim Robinson “i te tuatahi he tirohanga whakahaere noa iho tā te poari ki tēnei kaupapa.”

Engari kua pakaru mai te tautohe ā tikanga whakaaro, ā torangapu hoki ki tēnei rohe nō te tohuatanga e te kāwanatanga kia rua ngā kura hourua mā Te Taitokerau.

Nā tērā āhuatanga hoki kei te tirohia anōtia taua whakaaetanga e te poari o tēnei kura i te mea ko te nuinga o ōna kaiako he mema no Te Wehengarua.

Hei tēnei Rāhoroi ka tūwhera ngā tatau o te kura hourua o Whangarei Terenga Paraoa engari mā te wā anake tātou e kitea ai mēnā ka haukotia te ara whai mātauranga o āna tauira e ngā tautohenga o te wā mō ngā kura hourua.

Hei te paunga o tēnei marama puta ai te whakahau a te poari o Te Kura Tamatane o Whangarei.