Kei te hokona atu ētahi mahinga a Goldie

Wikitōria Day

He tangata i tino mate nui ki ngā tūpuna Māori o tēnā iwi o tēnā iwi, ā, nā ngā ringa auaha o Charles Goldie ēnei whakaahua i waihanga. Arā, ko Atama Pāpārangi nō Te Rarawa, Hera Puna nō Ngāti Whanaunga me te wahine a Wiripine Nīnia, nō Ngāti Awa.

E ai ki te kaihautū o Te Whare Toi o Te Ao, ki a Richard Thompson, “E whakapaetia ana ahau kua mōhio kē a Goldie i te hiranga o Ngāi Māori, koia ia i timata ai te kapo i ō rātou āhua mā te rere o te peita”

Hēoi, ā ko ake nei ka tangohia mai ngā whakaahua i ngā pātū o tēnei whare toi kia hokona atu, ēngari e mōniania ana te ngākau o Pouroto Ngaropo, i te korenga o ētahi i tae ā tinana atu ki te iwi o Ngāti Awa ki te kōrero tahi ki a rātau mō te take nei.

Hei tā Haami Piripi, heamana o te Rūnanga o Te Rarawa, i te wā i peitahia tōna tupuna a Atama Pāpārangi, te koroua i ārahi i tōna iwi, i oatitia ai, ka mau tonu i te whānau Pāpārangi te whakaahua.

Ko tā Haami e kii nei "Taku mōhio, i mōhio tonu a Atama i te wā i peitahia ia, he mahi nui. I runga i tērā whakaaro, nā te kaumātua nei a Goldie i whakaae kia tukuna atu tētahi o ana whakaahua ki te whānau o Atama ēngari kīhai tēnā oati i tutuki"

E tino tumanakotia ana ka whakahokia atu ngā taonga nei ki ō rātau ake iwi a tērā wiki.

Ko tā Haami anō rā e mea noa nei "Ko te tikanga ka noho tonu mai ki Aotearoa nei, kia kaua e riro ki tāwāhi noho tonu atu, engari me pēhea rānei te whai kaha ki te mea atu, heoi ko te tumanako, kei kona te ture e whakakahorengia te hokona atu ki te ao"