Kei te heke tonu ngā roimata mo ēra i mate ki Ahitereiria

Heeni Brown

Tokotoru ngā tāngata i mate whai muri i te mahi mauriri a Man Haron Monis i tētahi hunga tekau mā whitu mō te tekau mā ono haora ki te whare kawhe o Lindt ki te pū o Poihakena. A, ka mate a Monis ki te urutomo a ngā pirihimana, ā, he pērā tonu ngā rangi whakamutunga mō Katrina Dawson rāua ko Tori Johnson.

Ko 'hashtag I'll ride with you' tērā kua rere mārika i ngā taunga ipurangi maha. He whakatau ā ipurangi e tautoko ana i ngā uri Muslim huri noa i Ahitereiria whai muri i ngā maharahara ka tere piki ngā whakahē i ngā uri Muslim.

I puta tēnei i ngā mahi mōrearea o Man Horan Monis, te tangata nāna tonu i mauherea ai tētahi hunga tekau mā whitu ki tētahi whare kawhe ki te pū o Poihakena.

Tā ngā pirihimana whakatau, tekau mā whitu ngā tāngata i mauheretia e Man Horan Monis, he rima tekau tau te pakeke, he uri whakaruru nō Iran.

E mea ana ngā ripoata i puta atu i te kōti me te hāmene he hoa tautoko a ia i te kōhurutanga o tana hoa wahine ō mua, a Noleen Hayson Pal.

Tekau mā ono haora te roa o te mauriritanga, i kitea ai te matenga o Katrina Dawson rāua ko Tori Johnson.

Nā te kore mōhio ki ngā hiahia o Monis me te whakaaro tērā āhua whakaparahako ka whiua ki runga i ngā uri Muslim, ka tere piki te tautoko o te tini me te mano mo ngā pononga o te hāhi Ihirama ki Ahitereiria, mā roto mai i te taura pae tīhau #Illridewithyou.

Ko ngā kapua pouri tonu kei te whakamarumaru i a Ahitereiria, me tā te kawanatanga o Ahitereiria aro ki te pātai nui, pena rānei i tāea te kati i te huarahi ki ngā mahi morearea a Monis.

(He koha ēnei whakaahua me ngā uiui mai te ratonga whakapāoho o NITV)