Kātahi rā te kohinga nunui rawa o ngā toenga tūpapāku o ngā tīpuna Māori i te hītori o Aotearoa

updated Piripi Taylor

Kātahi rā te kohinga nunui rawa o ngā toenga tūpapāku o ngā tīpuna Māori i te hītori o Aotearoa, ko ērā kei te taki hoki mai ki te wā kāinga.

Ki New York i te ata nei, te kotahi rau mā whitu o ngā toi moko, kōiwi tangata, kiri moko hoki ka whakahokia ki ngā ringaringa māori i raro i tētahi kawenata i tutuki ki waenganui i Te Papa Tongarewa me te whare taonga hītori Māori ki Amerika.

He reo karanga te miri atu i ēnei taonga tapu, ko ētahi he tata ki te rua rau tau e noho tauiwi atu ana ki Honu Nui.

Tōmua i te pūaotanga o te rā, ka tīmata te hīkoitanga tapu ki te wā kāinga, a ēnei tīpuna māori, moriori hoki.

E toru tekau mā toru ngā toi moko, e rua ngā kiri moko kūhā, e rua tekau mā whā ngā kōiwi Moriori, e whā tekau mā ono hoki ngā kōiwi māori te kohinga nei, i āta kohia i te wā i kaha tauhokohokohia ai ngā toenga tūpāpaku o ngā iwi taketake ki Uropi me Honu Nui.

Nā whare taonga hītori māori ki Amerika te kohinga nei i pupuri. Ko ngā mihi nui ki a rātou, e kore rā e ārikarika i Te Papa Tongarewa mō te whakatau i puta i te Hakihea i te tau ki muri nei kia whakahokia rātou ki Aotearoa.

Hei te Rāmere ū atu ai te kohinga tapu nei ki Te Papa Tongarewa, i Te Whanganui-ā-Tara, ki te wāhanga tuarua o te wānanga huatau o Karanga Aotearoa ka tīmata hei te Rāpare.