Ka whakatūwherahia te whare hōu o Tūhoe

Mere McLean

E matapaetia ana ka whakatūwherahia te whare hōu o Tūhoe, he tekau mā rima miriona tāra tōna wāriu, hei te tuawaru o Poutūterangi ki Tāneatua.  E ai ki a Tamati Kruger o Te Uru Taumatua, e tau ana te whare ki roto i ngā pūtea i whakaritea tuatahitia mōna, ā, nuku atu i te toru mano tāngata e matapaetia ana ka tae ki tōna whakatūwheratanga mai.

Kua tata haere te wā mō te whakatūwheratanga o tēnei whare i roto i te rua tekau rā e tū mai nei, e ai ki ngā kaiwhakarite e tūtuki ana te nama i whakaritea.

Hei tā Tamati Kruger, o Te Uru Taumatua, “Kei te rite tonu te utu, kāre i nui atu i te tekau mā rima miriona kei roto tonu tērā karangatanga pūtea haere ana.”

He nui tonu ngā kaupapa o te wā mō Tūhoe, e rere tonu ana ngā huinga a te Komiti Māori mō rātou e hiahia ana ki te whakapuaki whakaaro mō te kereme whakatau o Tūhoe, ko te tirohanga hei te Pipiri rere ai te pānui tuarua o te pire o Tūhoe mō ngā kereme whakatau.  Hēoi, he huarahi nui tonu kei mua i te aroaro.

Hei tā Tamati, “Kei te tātata haere mai, me te mea he nui rawa atu ngā mahi kei te hiahia a Tūhoe ki te whaiwhai ake, ā, ko te waihanga haere i āna kaupapa ake. “

I roto i te tekau mārama kua hori, nuku atu i te kotahi rau ngā kaimahi kua mahia ki runga i tēnei wāhi, ā, he whitu tekau paihēneti o ngā kaiwhakatū whare nō Tūhoe tonu nei, ā, kua whai mahi hoki ētahi atu o te hunga kainga kia whakarākei i te wāhi i mua i tōna whakatuwheratanga ki te iwi nui tonu.

Ko tā Tamati hei tāpiritanga atu “Kei te mōhio katoa ngā kaimahi rā kei kōnā kei te haere te wā, nōreira ia pō ka kite atu koe i ētahi kei reira tonu e mahi ana ki te iwi, ki te tekau karaka i te pō ki roto, ā, kei te nui ngā tāngata kei waho hoki kei te rūmaki haere i ngā rākau.”

He konohete, he tekau haora te roa kua whakaritea mō tōna rā whakatūwhera, ā, kua whakaritea mai ko 1814 rāua ko Ardijah hei kaiwhakangāhau whakataki i ngā mahi o te rā.