Ka whakarite Te Kīngitanga mō tōna hui kōhanga reo

Hei āpōpō huataki ake ai te hui ā-motu mō ngā kōhanga reo ki Tūrangawaewae marae, e whakaritea ai he ara whakamua atu i ngā taumahatanga o te wā. Kāti, i ngā marama kua pahure, kua kōrero a Te Kāea ki ētahi whānau kōhanga reo mō ō rātou whakaaro ki tēnei take, me ō rātou wawata mō ngā rā kei tua.

Mārakerake ana te kitea i ngā kōhanga o te motu, kei te puāwai ngā mokopuna. Ko Rangi Anderson-O'Brien tātahi o nga pīpī tuatahi ki Te Kohanga Reo o Kia Tau Te Rangimarie i Whakatū - koia inaianei te kaiako. He tauira e kitea ana i te nuku o te whenua.

Hei tā Rangi Anderson-O’Brien e mea nei “He mea tino nui ki te hoki mai ki konei me hoatu”

Kāti ahakoa ngā taumahatanga, he aroha mutunga kore tō ngā whānau mō te kaupapa. Nā whai anō te hiahia kia whakatauria ngā nawe i te hui a Kīngi Tūheitia, āpiti atu kia whakaritea he mahere anga whakamua.

“Kei te hiahia au kia piri kotahi ai tātou ki tēnei hui ki te taha o te Kīngi me whakaputa mai tētahi āhuatanga pai rawa atu mō tātou katoa” te kōrero a Rangi Anderson-O’Brien.

Ko te whai reo o ngā whānau kōhanga ki te taumata o te poari matua kua hia marama e tonoa ana e ētahi. Nō nanahi whakapuakitia ai e te poari ngā tauira e whā mō tōna hanganga hōu. Hēoi, ko ngā mahere a ngā whānau hoki, e pōhiritia ana.

Ko tā Pae Jaman kōrero mō tēnei take e mea nei “Kei kōnei mātou e whakapau kaha ana ki te whakaako i ngā tamariki ki te taha wairua te mana aotūroa ērā momo mea katoa e kōrerohia i roto i te korowai engari kāre anō kia kitea mai e te poari.”

Kāti e kore e kahore ka whai pānga nui te hanga hōu o Te Poari Matua ki tana whiwhi kirimana hōu i Te Manatū Matauranga. E ai ki te Manatū i tēnei wā, e kore e whakahōungia te kirimana matua mō ngā pūtea whakahaere i te Poari Matua.

Hoinano rā, ko tā Lorraine Hale e mea ana, “Me whai reo ngā whānau ahakoa ko wai o ngā rohe ka tohungia hei māngai mō te rohe ki runga ake ki te poari mā te aha tēnā engari māna tonu e kawe i ngā kōrero a te rohe ki mua i te aroaro o te poari.”

Hei te poupoutanga o te rā āpōpō, pōhiritia ai ngā iwi ki te hui, kātahi ka whakarārangihia ngā take ka āta kōrerotia, ā haere ake ana te hui ki tōna mutunga a te Rātapu.