Ngā kaupapa: Education, Te Reo Māori

Ka ū ngā tauira o te Panekiretanga ki ngā tikanga Kotimana

He whakahoahoatanga tikanga, whakahoahoatanga ahurea te kaupapa o tā ngā mema o Te Panekiretanga o Te Reo Māori whai wāhi ki ētahi tikanga tuku iho, i te pā tapu o Dunadd, i te hauāuru o Kotirangi. Hei tā Paraone Gloyne, mema o te rōpu, kei te aro nui ki ngā mahi hei oranga mā ngā whakatipuranga o āpōpō.

Rere mai, rere atu ana ngā takutaku Māori, ngā karanga, te tangi tūturu anō o te iwi Kotirangi i te pā tūwatawata o Dunadd, i tētehi tikanga uruuru whenua. 

“He urupare i te karanga a te tangata whenua kia haere atu mātou ki reira ki tērā wāhi tapu, ki te whakatutuki i ā rātou tikanga, otirā ki te whakatutuki i ā mātou tikanga. Koinā te mahi wairua tuatahi i mahia e mātou nō ngā rangi ka mahue ake nei. Kātahi anō i tērā wā rā i rongo ai mātou i te wairua ā Māori Kotirangi nei tāku e mea nei.”

Nō te tau rima rau i tae atu ai te iwi Māori o Kotirangi mai i Airani, waihoki, koirā te pokapū tuatahi. I reira ka whakawahi ai ngā kiingi.

“Ko tētahi mahi motuhake, i horoia ō mātou waewae ki roto i tētehi oko kua whakaairotia ki te kōwhatu tapu o runga i tāua hiwa rā. He whakarangatira tērā nā rātou i a mātou i ngā tauhōu. I muri i tērā kua meatia mātou ō mātou waewae ki tētehi tapuwae.”

Nō tērā wiki toru tekau mā iwa ngā ika ā whiro o Te Panekiretanga, nā Amorangi, nā Tīmoti Karetu rātou i arataki ki Airani. Katahi ka haere ki Kotirangi, kei Wērā rātou ināianei ki te rangahau i ngā whakahaere mō te whakarauora i ngā reo taketake i Piritananui.

“E kaha ana tētehi tokoiti i roto o te iwi Kotirani nei ki te whakaora i ērā āhuatanga i roto i a rātou, me whērā anō tātou te Māori.”

Ka torotoro atu rātou ki ngā kaupapa reo hei ngā rā e tū nei me tētehi hui reo taketake o Wēra.