Ka timata rā ngā whakataetae waka ama ā-motu mō ngā kura tuarua

Rahia Timutimu

Nō te rā nei i tū ai te rā tuatahi o ngā whakataetae Waka Ama ā motu mō ngā kura tuarua o te motu, ā, mō te whakataetae i tīmata tekau mā toru tau ki muri nei koinei te tau o ngā tau, tata ki te tahi rau ngā kura tuarua e whakataetae ana. Kei te roto o Tikitapu a Te Kāea, i kōrero tahi me ngā kaihoe hou, tautōhito hoki

Karapinepine mai ngā kura tuarua nō te motu whānui ki te roto o Tikitapu i te rā nei, mō te rā tuatahi o te whakataetae waka ama ā-motu mō ngā kura tuarua

Kei tōna tau tekau mā toru te whakataetae nei, i timata tuatahi i Tāmaki Makaurau i te tau rua mano mā rua

E ai ki a Turanga Barclay-Kerr, “i tae kē mai au mai taku wā i te kura e tere ana i ngā wai nei o Tikitapu, ā, iaianei kua hoki mai au hei kaiwhakahaere mō ētahi o ngā kura o roto o Kirikiriroa, he pai te kite i tēnei hākinakina i tana tupunga mai tā mātou wā i kōnei, ā, te rahi o ngā kura i tēnei wā, ā, aua ake i a mātou i te kura.

Nō tōna timatanga mai koinei te tau nui rawa atu, nui ake i te tahi mano rima rau tauira i kitea ake nō ngā kura tuarua iwa tekau mā rima huri noa.

Tekau ngā kura hou kua mahuta mai ki tēnei whakataetae, ko ngā kura taitamatāne, taitamawāhine anō hoki o Whāngarei Terenga Paraoa etahi o aua kura i tae mai mō te wā tuatahi.

Mai ngā kaihoe hou ki ngā kaihoe tautōhito, i kitea tētahi kaihoe toa o te motu i te rā nei. Ko Cory Campbell te toa mō ngā kōtiro kei raro ngā pakeke i te tekau mā ono tau i te motu whānui, heoi anō, i tēnei wiki ka tū ia hei māngai mō tōna kura, a Turanga Wahine

Ka whakahaerehia te whakataetae nei tae rawa ake ki te Rāmere.