Kaupapa: Kapa Haka

Ka timata rā ngā whakataetae kapa haka ā-rohe o Te Arawa ki Rotorua

Heeni Brown

Koinei te pakari mai o Ngāti Rangiwewehi Pakeke Tuatahi, he rōpū kua whakakotahi i ngā uri o te iwi, ko ētahi he tautōhito o te ao haka.

Ā, ahakoa he rōpū tautoko noaiho, e mōhio mārika ana rātou, ki te hiahia kia eke ngā kapa e ono o Te Arawa ki Te Matatini me pūmau ki ngā ture o te whakataetae.

Nā, atu i ngā whetū o te ao haka - ko ētahi whetū o Hollywood hoki ka eke ki te papa whakatūwaewae o Te Arawa.

E whā ngā rōpū o Te Arawa i tū ki Te Matatini kua hori, ko Te Mātārae I Ōrehu, ko Tūhourangi Ngāti Wāhiao, ko Ngā Uri o Te Whanoa, ko Kataore ērā kua hoki mai ki te whakataetae ā-rohe. Ka mutu, ahakoa kua mana te tū ki Te Matatini i mua, ehara i te mea kua mana te hoki atu.

He rua tekau mā tahi ngā kapa ka eke ki te atāmira a te pō nei, tae noa ki āpōpō.

Nā, he tekau mā waru ngā kaiwhakawā ka tohu ko wai rā ka whai tūranga ki Te Matatini, engari ehara i te mea nā rātou anahe te whakatau, ina rā, me whai tika ngā kapa i ngā ture, ki te kore, ka kore pea e kitea he kapa e ono o Te Arawa e haere ana ki Ōtautahi a tērā tau.