Ka mutu rā te whakatewhatewhatanga ki te Poari Māori Motuhake o Tāmaki Makaurau

Nō te rā nei ka kapi te nohonga kōti teitei ki Tāmaki Makaurau, tērā i tū ai te Poari Māori Motuhake o Tāmaki Makaurau hei kaiwhakahoki. Ko tā te Poari ki te taki i hika ake i a Willie Jackson i tana kore whai tūranga ki runga i te poari, ko te mea kē, i roto i ngā tono koharinga mō Tony Kake, tērā i whakatūngia ai hei mema mātāwaka, i whai taunaki a ia mai i ngā rōpū mātāwaka o Tāmaki Makaurau.

Hei tā te roia nei mō te Poari Māori Motuhake o Tāmaki Makaurau, i whai reo mātāwaka ngā tono koharinga e wha mō Tony Kake.

Ko te ngako o te kēhi i rongohia e te Kooti Teitei i te ra nei, e wero ana i te whakataunga a te Poari Whiriwhiri, kia whakaturia ake ko Tony Kake hei mema maataawaka mo runga i te Poari Maori Motuhake, hei aha ko Willie Jackson, tumu whakarae mo te Manatu Mataaawaka o Manukau, ahakoa i whakarapangia nga reta tautoko mona mai i nga roopu mataawaka maha o Tamaki ki tana tono. 

E ai ki te roia o Willie Jackson, ki a Te Kani Williams e mea ana “horekau he kōrero mō te kaitono nei, mō Tony Kake, e paa ana ki ngā mōhiotanga a ngā hapori Māori o Tāmaki Makaurau ki a ia, ā, mō taua kaitono”

Ko John Tamihere, te mema mātāwaka tuarua o te Poari. Hei taana, e tohu ana te kēhi nei i ngā rerekētanga tukanga hei tohu i ngā māngai mātāwaka ki te poari.

 “Me ahei ngā poari ā-iwi i ngā momo tūkanga katoa e tāea ai tātou te rongo i ngā painga mō wai atu rānei”

Ko te tū a te roia mō te Minita Take Māori, ko te mea kē, kia kaua e riro mā te Minita te mana whakatau I te take nei, ahakoa kua puta te raru nei ki mua I te aroaro o te kōti.

Tāria te wa, puta he whakatau i te kōti, engari hei tā John Tamihere anō, ehara tēnei i te kēhi whakamutunga pēnei ka tū ki mua i te aroaro o te kōti.