Kaupapa: Entertainment

Ka mārena tonu a JGeeks ahakoa ngā ture o Te Tari Manene

Aroha Treacher

Hei ngā rangi tata, ka mārena a Marino Taiatini nō te rōpū JGeeks i tōna Hinemoa, i a Jessica Canalin, kei Hawai'i e noho ana.  Heoi, oti ana te mārena i ngā moutere o ngā iwi taketake ka wehea rāua ki whenua kē mō te kōtahi tau, nā te nui o ngā tikanga here a Te Tari Manene.

He aroha kua mau roa, ahakoa kei pāmamao te tau o te ate e noho ana.

"Kia kaua māua e noho pōuri ana, me whakapono ka eke māua ahakoa te aha," tā Taiatini.

Nō ngā JGeeks ia, he rōpū whakangahau i te marea.  I rongonui rātou i te hōtaka New Zealand's Got Talent i te tau rua mano tekau mā rua.

Nō Whiripīna aia engari kei Hawai'i e noho ana, i tūtaki ki tōna Tūtanekai i a ia e toro ana ki reira i tērā tau.

"I rere ngā kora ki waenganui i a māua, i whāki atu au ki taku kaihanga, kāore e kore, ka mārena māua ko taua tama," tā Canalin.

Ehara ia i te tangata whenua o Amerika, nā reira, tē taea te mārena ki Hawai'i, otirā, nā te nui o ngā tikanga here mō te hunga manene, me wehe rāua ki whenua kē, mutu kau ana te mārena.

"Koinei te mamae, inā ka mārena māua, ka wehe māua hei te mutunga. Haere rā, māku koe e kite hei te kōtahi tau," tā Canalin.

Engari, kei te noho tōrunga ngā whakaaro, me te mea inā tau ana te puehu, ka whaoa e rāua he ara hōu ki Hawai'i.