Ka aukatingia ōkawatia te whakapōauau waihanga

Me uaua ka kitea he rongoā kotahi e ora ai te tangata kua warawara ki ngā whakapōauau waihanga, heoi mā te aro turuki a te whānau me ngā hoa i te kaiwarawara, e tāea ai. Koinei te āki a tētahi kaiwhakamaimoa whakapōauau i te whakakoretanga o ēnei momo whakapōauau ki ngā toa. Hei tāna, me tauawhi rā te hunga maha e hoki ora mai nei i te ara whakawairangi.

Ahakoa e tūwhera tonu ana ngā toa i kaha hokona ai ngā whakapōauau waihanga. Nō te rangi nei aukatia tēnei momo taru e ēnei toa. Nā whai te takatū mai a ngā kaitautāwhi i te hunga e mate ana ki tēnei momo kai, ki te pikitanga ake o te hunga e whakapā atu ana ki a rātou.

Hei tā Ben Birks, “ko te mea nui e rongo nei e te kaitarutaru, ko te whakawairangi, te hōhā, te pukuriri ki ētahi atu, te rongo i te au o te mātao me te werawera, te whakaheke i te tōtā, ā, te kore hia i te kai”

Hēoi e ai ki a Ben Birks kua tekau tau e mahi ngātahi ana me te hunga rangatahi e mate ana i te mate whakapōauau, ko āna momo mahi tētahi paku wāhanga noa, o ngā tautāwhitanga, e tika ana mō tēnei hunga.

Hei taana anō, ko ngā wiki e rua nō te wā i mutu ai tāna kai i tēnei kai, te wā e kaha pākia ai te kaiwarawara e te pōrarutanga, nōreira mō ngā whānau, hoa tata rānei, ko tā rātou he whakaū i a ia ki te ara tika.

Me he āwangawanga ōu mō tetahi mema whānau, hoa rānei, whakapā atu ki tō tākuta, mā rātou koe e whakamōhio atu ko wai ngā ratonga tautoko i te mate whakapōauau pātata atu ki a koe.