Hui Ahurei o Tūhoe - The new haka 'Te Hokokura'

Taroi Black

Whā tekau tau a Ngāi Tūhoe e haka ana i Te Puru, he kupu whakarite mō te whakahīhī a ngā tauā a te Karauna. Otirā i tēnei tau ka tāmoea taua haka kia ara ake ai he haka hou, ko Te Hokokura te ingoa.

He tangi ka paoro ake i te whārua o Ruatoki, ki ngā iwi e pae nei.

I tōna hakanga tuatahi, ko Te Hokokura tēnei a Tuhoe, e au ake nei i te papa tūwaewae.

“Kei roto tatou i tenei ao hou ehara i te mea me wareware tatou i nga korero o nehe engari kei te titiro ke tatou ki te anga whakamua rima tekau, kotahi rau tau kei mua i a tatou,“ hei tā Ngatai Rangihau no Ōhinemataroa ki Ruatahuna.

“He pai tera haka ki ahau ki te iwi a kia noho tapu to tatou haka matua tera ko Te Puru,” hei tā Tyler Tihi Pitau no Tūhoe ki Kawerau.

“Kua tae pea ki te wa kia whakata i a Te Puru noreira ka mihi atu ki nga kaitito o tenei haka he haka pai tena,’ no Hori Uatuku no Ngāti Koura.

I titoa te haka o Te Puru i te tau kotahi mano waru rau ono tekau ma wha hei whakahē i te urutomohanga mai a te tauā o te Karauna. A kei te hiahia ētahi o ngā uri kia mau tonu ai aua hitori nā reira ka haka tonu rātou i Te Pūru a ngā rā kei tua.

E ai ki a te Rangihau, “Ko te korero a te whanau kare i tika kia parea nga tikanga ki te taha na ko Te Puru koira tetahi o nga mahi kei roto i nga tikanga noreira koira ta matou tohe atu ahakoa kei roto ahau i te ropu na matou i tuhi, i tautoko ahau i nga korero o taku whanau.”

Ahakoa kua whai wahi Te Hokokura ki tenei hui ia rua tau inaianei ka taea tonu nga rangatahi o Tuhoe te whakamahi i te haka ki nga kaupapa katoa puta noa ki konei, me nga kaupapa kei mua i te aroaro.