Hei tā te whanau Takamore kore rawa rātou e tuku noa i te tūpāpaku o James ki tōna pouaru

Mere McLean

Mā te kariri ki te rae rāno e taea pea te tīhae i te tūpāpaku o James Takamore mai i ōku ringa! 

Koinei te wero a te māngai o te whānau Takamore ao ake i ngā whakaritenga a tōna hoa rangatira kia hahu ake i tōna tūpāpaku mai i tōna ūkaipō i Kutarere me te hiahia kia whakahoki atu ki Ōtautahi.  Otirā, kīhai te whāinga i tutuki. 

Hei tētahi kaumatua o te whanau Takamore, e kore mō te tūohu ki te ture, ngā pirihimana me te pouaru a James Takamore, arā a Denise Clarke.

Nō te pātanga o te kōrero ki a rātou, ka haere te whānau Takamore ki te moe ki te urupā i te pō rā, kia rite rātou mo te taenga atu o ngā pirihimana. 

I waenganui i te toru tekau ki te whā tekau te hunga i konei i te ata hāpara me te whakatau nui mai te tuahine o James Takamore, a Josie Takamore i tutuki tā rātou i tohe ai kia noho tonu ia ki konei. 

I aukatia ngā mihini kari e te whānau, ā, nō te kitehanga atu a ngā pirihimana i te pupū te riri, katahi wehe atu ngā apiha i te wāhi.

I riro ki a Denise Clarke te mana mai te kōti teitei kia hahu i te tūpapaku o tōna hoa mai i te urupa o Kutarere katahi ka tanumia atu ki Ōtautahi.

Ko te whakatau a te māngai o Kutarere Marae a Bruce Pukepuke, ko tā rātou he mahi tahi me te whānau tae noa ki ngā pirihimana kia kite i tētahi huarahi rangimarie, engari ko tāna inaianei kei te whānau Takamore te whakataunga whakamutunga.